Ишге гючю чатагъан юрт ерлерде яшайгъан ватандашланы авадан пайы да пачалыкъны ва халкъыбызны сурсат аманлыгъын якълап, гьар тюрлю юрт хозяйство тармакъларда танглагъан касбуларына къуллукъ эте. Тюзюн айтсакъ, муниципал ва топуракъ реформаланы талаплары толу кюйде яшавгъа чыгъарылмайгъаны саялы, юрт ерлерде яшайгъан­ ишге гючю бар бир-бир гюплери республикабызны шагьарларында, шолай да уьлкебизни оьзге регионларында ва ондан да тышда къазанч учун иш излеме чыгъагъан гезик­лери де кем болмай.

 Дагъыстанда маълумат жыйыв ва аянлашдырыв булан машгъул къурумлар аян этеген кюйде, артдагъы йылларда бизин рес­публикабызда ишсизлени санаву 50 мингге ювукълаша. Шону учун янгы иш ерлени ачыв яда буса иш береген далапчы тайпалар, къурумлар булан байлавлукъда иш гёрювню масъаласы агьамиятлы.

Ишсизлени загьматгъа къуршамакъ муратда Бютюнроссия ярмакюню 11-нчи гезиги «Россияны загьматы. Имканлыкъланы заманы» деген чара Авар театрны майданында 23-нчю июнда ахшам сагьат уьчден еттиге ярым болгъунча заманны ичинде оьтгерилежек.

«Ёлдаш» газетни охувчуларына шо гьакъда ДР-ни загьмат ва яшавлукъ масъалалар булан машгъул болагъан министерлигини башчысы Мурат Къазиев баянлыкъ берди.

– Ярмакюде Дагъыстанда ишлемеге сюегенлер учун 1 минг иш ерлер малим этилежек, – деди эсгерилген министерликни баш гьакими. – Шондан башгъа да, Россияны оьзге регионларында ишлемеге муштарлылар учун дагъы да 6 минг иш ерлер токъташдырылгъан. Савлай алгъанда, иш ерлер береген предприятиелени санаву 100-ге етише. Иш беривчюлени арасында бизин республикабызны «Дагдизель» заводу, «Завод им. Гаджиева», «Концерн КЭМЗ» акционер жамиятланы ва шолай оьзгелерини вакиллери болажакъ.

Иши ёкъ, тек ишлемеге муштарлы охувчуларыбыз учун сёз толу болсун учун ярмакюде увакъ ва орта далапчылыкъ булан машгъул болагъан тармакъларда да иш тапмагъа имканлыкълар болдурулажакъ.

Ярмакюню барышында халкъ саниятларыны ва маданият усталарыны ортакъчылыкъ этивю булан онгарылгъан чаралар да оьтгерилежек.