Апрель айны 10-нда, итнигюн, «Дагъыстан» маълумат агентлигинде Магьачкъала шагьарны мэри Ризван Газимагьамматов ва Магьачкъаланы вонкому Геннадий Къурбанов журналистлер булан ёлугъув оьтгерди. Ёлугъувда бу йыл асгерге чакъырыв нечик оьтгерилегенни гьакъында сёз юрюлдю. Магьачкъала шагьарны администрациясыны башчысы ва шагьарны асгер комиссары журналистлени соравларына да тындырыкълы жаваплар берди.

Дагъыстанны асгер комиссары Дайитбек Мустафаев де бираз алда бу ёрукъда ёлугъув оьтгерген эди. Онда да, бу ёлугъувда да эсгерилгени йимик, армиягъа янгы къабул этилген яшлар дав юрюлеген Донецк, Луганск республикалагъа ва Херсон, Запорожск областлагъа йиберилмежек. Украинада юрюлеген хас асгер операцияда ортакъчылыкъ этмежек. Бир йылдан сонг уьйлерине къайтажакъ. Дагъыстандан къысгъа болжаллы асгер борчну кютмек учун бу йыл язбашда 4 минг яш чакъырылажакъ. Магьачкъаладан ва Магьачкъала округдан шо санав нече экенни военком айтмады. Тек ол эсгерген кюйде, армиягъа барма сюеген яшланы барысына да асгерде къуллукъ этмеге имканлыкълар етише.

Асгерге чакъырылагъан яшлар учун армияны сыдраларында къуллукъ этмек, бек сыйлы борч деп тезден берли де айтыла гелген. Гьали де шолай. Ондан къайры да, бу сыйлы къуллукъ жагьиллени хыйлы яхшы хасиятлагъа уьйрете. Асгер къуллукъну вакътисинде олар Ватангъа бакъгъан сюювюн артдырагъан патриот ругь булан тарбиялагъандан къайры, жагьил къаркъараларын да чыныкъдыра. Шо пикруну гертилигин Магьачкъаланы администрациясыны ёлбашчысы да бирдагъы керен ачыкъ этип оьзюню ойларын айтды.

Военком ёлугъувну башында армиядан къачып юрюмек эрши экенин айта туруп, закон булан да такъсырланагъанны англатды. Балики, яшларын армиягъа йиберме сюймейген ата-аналар да бардыр. Олар шолай сюймей буса, янгыз оланы гюнагьлы этип къойма да ярамас. Олар гьалиги гьалны ахтигин англамай болмакъ бар. Неге тюгюл, военкоматланы янындан асгерге чакъырывланы алдында да, олар юрюлеген вакътиде де халкъны арасында англатыв иш тийишли кюйде юрюлмей. Шо буса военкоматланы къайсыны да юрютме тийишли къуллукъларындан бириси болма тарыкъ. Гьали чи, Украинада хас асгер операция юрюлеген вакъти, айрокъда.