Декабр айны 13-нде Дагъыстан Республиканы Гьукуматыны Председатели Абдулмуслим Абдулмуслимов Хасавюрт районну Нурадилово юртунда янгы участка больницаны ачылывунда болгъан. Бу хас чараларда ДР-ни савлукъ сакълав министри Татьяна Беляева, районну башчысы Арсланбек Алибеков да ортакъчылыкъ этген.
15 аврувгъа ери булангъы Нурадилово юртда ачылгъан участка больницаны поликлиникасында гюнде 50 адамны савлугъун тергеме имканлыкъ бар. Медицина идараны къурмакъ учун 39 миллион манат харжлангъан. Абзарын онгармакъ учун да 9 миллион манат гетген.
Гьукуматны Председатели республиканы Башчысыны ва оьзюню атындан да районну ватандашларын гёрмекли агьвалат булан къутлагъан.
«Бираз алда биз Ватанны Игитлерини гюнюн белгиледик. Оланы эсделиклерине гьюрмет этдик. Бу юрт да Уллу Ватан давну ортакъчысы, Совет Союзну Игити Ханпаша Нурадиловну атын юрюте. Ону къоччакълыгъы, ватангъа гьалаллыгъы бизин учун уьлгю болуп токътай.
Шолай бирдагъы уьлгю – оьзлени ишине савлукъ сакълав къуллукъчуланы гьакъ юрегинден янашагъаны. Олар коронавирусну яйылыву башлангъандокъ, аврув булангъы ябушувну ал сыдыраларында юрюме гиришди. Бирлери чи оьзлени къызгъанып билмей, жанларын да къурбан этдилер.
Эсге гелтирсек, 2020-нчы йылда, коронавирус аврувну яйылывуну алдын алмакъ учун этилген иши саялы, Хасавюрт районну медицина къуллукъчуларыны 5-вюне РФ-ни Президентини янындан оьр пачалыкъ савгъатлар тапшурулду.
Савлукъ сакълав тармакъда чалыша туруп, республикада оьр абур къазангъан адамланы арасында Хасавюрт райондан да кёплер бар. Оланы хыйлысы бугюн де Хасавюрт район больницада ишлей. Янгы къурулгъан участка больницаны медицина къуллукъчулары да олардан уьлгю алып чалышар деп эсиме геле», – деп тамамлагъан сёзюн Абдулмуслим Абдулмуслимов.
Янгы ачылгъан медицина идара «Соболь» деген санитар машинге ерли бары да тарыкъ-гереги булан таъмин этилген.
