Хасавюртда Горькийни атындагъы гимназияда охувчуланы белгили адамлар булангъы ёлугъувлары кёп бола.
Бу гезик яш спортчулар Дагъыстанны тай боксдан тренери, Россияны спортуну устасы Аслан Маметов, шо ябушувдан дюньяны ва Европаны чемпиону Абдулгьаким Порсукъов, Россияны чемпиону Мугьаммат Герейханов, тай боксну тренерлери Закарья Зубайыров ва Солтан Алиев, муай-тай ябушувдан бу йыл уьлкеде инг яхшы деп ат алгъан Рамазан Эсенбаев булан ёлукъдулар. Белгили спортчулар яшлагъа оьзлени оьтген спорт ёлу булан бирге, уьстюнлюкге етишмек учун нечакъы къаст этме ва эринмей-талмай спорт булан машгъул болма герекни хабарладылар.
Яшланы соравларына жаваплар берип битгенден сонг, олар гимназияны стадионунда яшлагъа турниклерде тартылып, чабып ва атылып, яшлар булан зарядка этип, спорт булан машгъул болма чакъырдылар. Шу ёлугъувну Хасавюрт шагьарны депутатлары Магьамматсайит Арсланов ва Гьажимурат Рашитов онгаргъанны да эсгерип къояйыкъ.
Г.БЕК.
