Биринчи таймда Ташуевни командасы къонакъланы къапусуна этген чакъы чапгъынны, оюнну башындагъы гьужумну Евдокимов ювукъ арада унутуп битер деп эсиме гелмей.
Оюнну еттинчи минутунда узакъ гьужумну натижасында арекден Георгий Зотов ургъан топ къонакъланы къапучусун эсер-месер этип къойду. Шолайлыкъда, оюнну биринчи таймында оренбурглулар «Анжини» къапуларына ювукъ болмагъа гьасирет къалды. Неге тюгюл, бизинкилер гючлю гьужум этип турду .
Къолдан чыкъгъан къоркъунчлу мюгьлетлени санаса чы, олар бир нече оюнгъа да таманлыкъ этер эди. Тек биринчи тайм битгинче 1:0 санав алышынмады.
Экинчи таймда оюнну агъымы алышынды. «Газовик», эс табып, бизин команданы къапусуна багъып чапгъынлар эте башлады. Оюнну 63- нчю минутунда бизин орта якълавчуланы хатасындан пайдаланып, къонакъланы орта якълавчусу Друзин оюнну санавун 1:1 этип тенглешдирди.
Озокъда, «Анжи» оюнну тенг санав булан тамамламагъа гёз алгъа тутмагъан эди. Нечик де, команданы ортакъчыларыны алдына шо оюнну утмакъ деген масъала салынгъаны биревге де янгылыкъ тюгюл эди.
Шо саялы бизин команда къонакъланы къапусуна биринчи таймда йимик гьужум башлады. «Газовик» буса, сав команда булан артгъа тартылып, гери чапгъынлар этме къарай эди. Шо гери чапгъынланы бириси голгъа айланма да аз къалды. Бизин къапучу Кержаковну ва якълавчубуз Гьажибековну гьаракаты булан «Анжи» гол алмай къутулма болду. Тек оюнну 82- нчи минутунда бизин якълавчу Аравинни пасындан Боли башы булан гийирген кёп арив голдан къонакъланы бирев де къутултма болмады.
Шолайлыкъда, «Анжи» ахырынчы оюнун 2:1 санав булан утуп, турнир таблицаны башында да ерлешип, экинчи ерде барагъан «Томьдан» уьч очкогъа кёп де къазанып, яхшы хошу да булан къышлыкъ танапусгъа гетди.
Къонакъланы баш тренери биз оьрде эсгерген баянлыгъында: «Анжи» бугюн гючлю эди, ону токътатма къыйын эди. Бу оюндан уьч очко да «Анжиге» гьалал, тийишли эди»,– деди. Ташуев буса, гьар заман йимик, кёп сёйлемейли, футболистлеге оьзюню разилигин ва баракалласын билдирди. Команда гелеген йылны январ айыны 8-и болгъунчагъа ял алгъан сонг, чемпионатны экинчи язлыкъ бёлюгюне гьазирлик гёрмеге башлажагъы гьакъда да айтып билдирди.
Ш. КИШИЕВ
СУРАТДА: оюнну мюгьлети.
