Гьали-гьалилерде ДР-ни Башчысы Сергей Меликов ДР-ни Халкъ Жыйыныны еттинчилей сайлангъан ортакъчыларыны тогъузунчу сессиясында Дагъыстанны яшавлукъ-экономика оьсювюне байлавлу болуп етишген натижалагъа гёре гьисап берди. Шондан сонг эсгерилген масъалагъа байлавлу болуп ол РФ-ни Президенти булан болгъан ишчи ёлугъувунда да агьамиятлы яшавлукъ ва экономика масъалаланы яшавгъа чыгъарылывуну гьасиллерин де аян этди.

Уьстде эсгерилген эки де агьамиятлы агьвалатлагъа гёре бугюнлерде ДР-ни транспорт ва ёл къурулуш министри Жамболат Салавов да республикабызны маълумат къуралларыны къуллукъчуларына оьз пикруларын, ойларын малим этди.

 – Транспорт республикабызны яшавлукъ-экономика оьсювюнде аслу тармакъ саналагъанын бирев де инкар этмеге болмай, – деп узатды оьзю­ню баянын Жамболат Шапиевич. – Неге десегиз, транспорт къуллукъсуз гьалиги заманда тармакъланы бириси де оьсмейгени белгили. Гертиден де, шону учун транспорт къуллукъчулар бар имканлыкълагъа гёре гьар тюрлю онгайлыкъланы артдырыв агьамиятлы. Муна шо саялы да ёл къурулушунда гьар тюрлю оьлчевдеги бюджетлерден айырылагъан акъча маяланы асувлу кюйде къолламасакъ бажарылмай. «Мени Дагъыстаным – мени ёлларым» деген регион ва шолай да «Аманлыкъны асил ёллары» деген федерал программаларда белгиленген жаваплы борчланы яшавгъа чыгъармакъ учун тапшурувлагъа намуслу кюйде янашыв гьажатлы.

Адамланы ва гьар тюрлю юклени ташыйгъан транспортну имканлыкъларын толу кюйде пайдаландырмакъ учун ерли, регион ва федерал оьлчевдеги ёлланы ярашдырыв ва янгыртыв ич ва тыш байлавлукъланы беклешдире. Шону учун бизин рес­публикабыздан оьтеген «Темиркъазыкъ-Къыбла» деген транспорт коридорда, юртланы ва шагьарларыбызны бир-бири булан байлайгъан ёлларда йимик сув, гьава, темир ёлланы имканлыкъларын да къолдан чыгъармагъа тюш­мейгени англашыла.

Уьстде эсгерилген пачалыкъ программаланы оьлчевюнде бизин респуб­ликабызда муниципал къурулувларындагъы ёлланы ва орамланы ярашдырмакъ учун, 2022-нчи йылгъа 1,6 миллиард манат гёрсетилингени гьакъда.

Шону булан янаша фе­дерал бюджетден айырылагъан акъча маялагъа гёре бу йыл да «Кавказ» деген федерал ёлну дёрт транспорт оьтеген даражада генглешдирив давам этилежек. Уьстевюне, Магьачкъала ва Дербент шагьарлар юрюйген транспортну юрюшюн ёрукълашдырмакъ учун эки де шагьарны ичине гирмей оьтеген кюйде айланч ёлланы къурув башланажакъ.

Къ. КЪАРАЕВ.