Сабур согъулуп турагъан макъам лап сел бола туруп, жыйынны юрютювчюлер сагьнагъа чыкъды. Олар, биринден-бири алып дегенлей, жыйылгъанлар булан саламлашды, сорашды. Жыйын негер ва кимге багъышланагъанны такрар эте туруп, юбилярны сагьнаны тёрюне чакъырды. Жыйылгъанланы уллу харсына В. Атаев сагьнадагъы столну артына чыгъып ерлешди.
Сонг жыйынны юрютегенлер Вагьит Атаевни яшав, яратывчулукъ ёлун суратлап баянлыкълар айтдылар.
Гертиден де, Вагьит агъай – ким де сукъланардай къысматы булангъы пагьмулу адам. Кёп санавдагъы китапланы, макъалаланы есиси. Ол язгъан шиъруланы хыйлылары йырлагъа салынгъан. Дюр дагъы, поэзия оьзюню лап оьр мукъаятлыгъына етип битгенде, баягъы, макъамгъа дёнме талпына. Йыр буса поэзияны бойламас яда тюгесинмес ниъмат теренлигин аривлюк булан сезмеге болушлукъ этеген лап къужурлу затдыр. Шону учун болгъан буса ярай шатлыкъны барышында яшланы ва уллуланы ортакъчылыгъы булан Вагьит Атаевни йырлары кёп йырлангъаны, сагьнада ойналып гёрсетилгени. Жыйылгъанлар шолагъа тынглап тазза къандылар.
Бу ерде оланы гьар бирисини айрыча атын, хатын тутуп эсгерип йиберсек, макъалам газетни сагьифасына сыймас эди. Чыгъып сёйлегенлер де, йырлагъанлар, театр къайдада ойнавлар гёрсетгенлер де Вагьит агъайгъа багъышлангъан шатлыкъ мажлисни маънасын бек бай этгени гьакъ зат. Тек мен бу ерде профессор Забит Акавов этген лакъырны къысгъа этип, маънасын малим этмекни оравлу гёрдюм. Ол, халкъны алдына чыгъып, В. Атаевни яратывчулугъуна багъышлап Д. Атаева да булан сав илму-анализ китап чыгъаргъанны эсгерди, сёзюню артында Вагьитге «Дагъыстанны халкъ шаири» деген атны берсин учун оьрдеги къурумлагъа англатыв бермекни оьзю бек тийишли гёрегенни билдирди. Ону шо сёзлерин жыйылгъан яш да, уллу да уллу разилик булан, харс булан къаршыладылар.
Дагъыстанны язывчуларыны союзуну председатели М. Агьматов, оьзюню сёйлевюн тамамлай туруп, В. Атаевге М. Лермонтовну атындагъы медальны да тапшурду. О да гиччи савгъат тюгюл.
В. Атаевни юбилей вечери 4 сагьатгъа ювукъ узатылды. Чинкдеси – жыйын аслу гьалда къумукъ тилде юрюлдю. Гьалиги заман бу тайпа жыйынлар орусча тюгюл юрюлмейген болуп бара.
Шо гюн Вагьит агъайгъа арив ёравлар, алгъышлар багъышлангъаны йимик, саламат кюйде савгъатлар да тапшурулду. Мен гьисап этеген кюйде, оьзюню ич маънасы, юрюлген кюю булан Вагьит Атаевни юбилей мажлиси яшланы дюньясын чы нечик де бай этди, къумукъ тилни оьзлюгюн де яхшы кепде оьрге гётерди.
Вагьит агъай – табиатына гёре, берекетли адам. Жыйындан сонг ол къургъан къонакъ стол да берекетге емирилип геле эди.
Яшланы шаир дюньясыны шагьы болгъан Вагьит Атаев, гёлем къаламыгъыз да, къол къаламыгъыз да бир заман да къажымасын! Сиз халкъыбызгъа, айрокъда яш наслугъа бек тарыкъсыз ва аявлусуз!
А. БУГЛЕНЛИ.
Суратларда: М. Агьматов
В. АТАЕВГЕ медаль тапшура; залдан гёрюнюш .
