Магьачкъаланы администрациясыны жаваплы къуллукъчулары бизге билдиргени йимик, республиканы тахшагьарында Р. Гьамзатовну проспектинде, ачыкълашдырып айтгъанда, М. Дахадаевни атындагъы орамдан М. Ярагъыны атындагъы орамыны дазуларында, Москвадагъы Арбатгъа ошатып, яяв юрюйген бир бою къурулажакъ. Шо сипте Уллу Уьстюнлюкню гюнюн ва Магьачкъала шагьарны юбилейлерин белгилевню оьлчевюнде яшавгъа чыгъарылмагъа гёз алгъа тутула.
Эсгерилген проектни яшавгъа чыгъармагъа тюшеген чаралар, арбагюн, апрель айны 12-синде, Магьачкъала шагьарны гьакимбашыны орунбасары Запир Алхасовну ёлбашчылыгъы булан оьтгерилген генгешде арагъа салынып ойлашылгъан. Шондан сонг генгешни ортакъчылары оьрде эсгерилген яяв юрюв бойну къурмагъа гёз алгъа тутулгъан ерге къарагъан.
Генгешни ортакъчыларыны пикрусуна гёре, дюнья оьлчевюнде де уллу шагьарланы ортасында яяв юрюйген бойлар къурув мердешленген. Шолай ерлер янгыз шагьарда яшайгъанланы иштагьландырып къоймай, гелген къонакъланы да тергевюн тарта. Шону булан байлавлу болуп тахшагьарны ёлбашчылары ватандашланы ял алывун болдурмакъ, олай да уллуланы да, яшланы да маданиятгъа ва спортгъа къуршамакъ учун бир тюрлю чаралар белгилеген. Тахшагьарда яшайгъанланы ва гелген къонакъланы ял алывун болдурмакъ учун шо яяв юрюйген бойда сурат чыгъарылагъан ерлер, гиччирек савгъатлар сатылагъан тюкенлер де болажакъ. Шону булан бирге, художниклеге де орамда яратывчулукъ булан машгъул болмакъ учун шартлар яратылажакъ. Гьар тюрлю макъамлагъа, олай да бир-бир спорт алатлар иш гёрежек.
Ачыкълашдырып айтгъанда, къаттыгюнлерде эртен 8 сагьатдан ахшам 21 сагьатгъа ерли оьрде эсгерилген орамланы боюнда автомашинлени юрюшю гери урулажакъ. Шо проектни яшавгъа чыгъармагъа Р. Гьамзатовну атындагъы проспект танглангъаны да негьакъ тюгюл. Нечик де, Р. Гьамзатовну атындагъы проспект Магьачкъала шагьарны инг аслу орамларындан бириси болгъандан къайры да, ватандашланы ял алмагъа лап да кёп сюеген ери гьисаплана.
Запир Алхасовну сёзлерине гёре, 1 Май байрамны белгилевню вакътисинде тахшагьарда ватандашлагъа ял алмакъ учун инг онгайлы шартлар болдурулажакъ. Шо гюнлерде орамларда сатыв-алывну юрютювден къайры да, ватандашланы толу кюйде ял алывун болдурувну чаралары да белгиленип тура.
Бизин республиканы тахшагьарыны гьакимлик къурумлары яяв юрюв бойну къурувгъа байлавлу проектни яшавгъа чыгъарывда жагьлы кюйде ортакъчылыкъ этмеге чакъырагъанын айрыча эсгермеге тюше. Магьачкъала шагьарны администрациясы жамият, яшёрюмлер, студентлер къуршалгъан бирлешивлени яратывчулукъ коллективлени ва бары ватандашланы проектни яшавгъа чыгъарывда сиптелерин къабул этмеге ва гьисапгъа алмагъа гьазир. Шолай сиптелер булан ватандашлар тахшагьарны маданият, сатыв-алыв ва далапчылыкъгъа къарайгъан управлениесине, спортгъа, туризмге ва яшёрюмлени ишлерине къарайгъан комитетге етишдирмеге бола.
Бизин мухбирибиз.
