Террорчулукъ бугюнгю жамиятны баш къайгъысы болуп битген. Санкт-Петербург шагьарда болгъан террор иш, арты булан Европаны оьзеги Стокгольм шагьардагъы жинаятчылыкъ… Шо мисалланы сиягьын нечакъы сюе бусанг да узатмагъа бола. Телевизорну алдында олтурсанг, оьлтюрювлерден ва атылтывлардан къайры дагъы янгылыкъ да ёкъму экен деп ойлаша къаласан.

_____________________________________________________________________

Алдан берли динибизде бир адамны оьлтюрмек савлай адамурлукъну оьлтюрмекге тенг дей эди буса, гьали адам оьлтюрюв гьалиги девюрню баш белгиси болуп битген. Шо терс къаравлардан яшёрюмлерибизни къоруп сакъламакъ савлай жамиятны алдынлы борчу болуп токъта­гъан.

Бабаюрт районну оьзюню янгы тарихине террор ишлер къанлы хат булан язылгъан. Бир вакътини ичинде законсуз кюйде савутлангъан бандит бёлюклени иш гёреген уьюрлери райондагъы гьалны къыставуллу этип де турду. Насипге, аманлыкъ сакълав къурумларыны къастлыгъы булан районгъа гене парахатлыкъ гелди.

Буса да, этилмеге герек ишлер де аз тюгюл. Бугюн Сирияны законлу гьакимиятына къаршы дав этеген бабаюртлуланы санаву онлар булан санала, оьлгенлери де ёкъ тюгюл. Шо буса, бизин оьсюп гелеген яш наслу оьзлени агъаларыны ва ювукъ адамларыны хаталарын такрарламасын учун, ерлерде чаралар гёрмеге герегин англата.

Шону да районну башын тутгъанлар, яшёрюмлер булан иш гёреген жамият къурумлар яхшы англайлар ва районну ичинде яшрёюмлер булан гьар тюрлю чаралар да оьтгериле. Артдагъы гюнлерде Бабаюртда район администрацияны яшёрюмлени, спортну ва маданиятны ишлерине къарайгъан бёлюгюню, инчесаният школаны сиптечилиги булан оьтгерилген «Бабаюрт районну яшёрюмлери террорчулукъгъа къаршы» деген фестивальны мурады да яшёрюмлени террорчулукъну ва экстремизмни торундан къоруп сакъламакъ эди.

Фестивальны ача туруп, ра­йонну ёлбашчысыны аманлыкъгъа къарайгъан ярдымчысы Солтангерей Бийтемиров террорчулукъ бугюн уллу оьлчевлеге чыкъгъанны эсгерди.

− Эгер террорчулукъну балагьы бизге етишмежек деп ойлаша бусакъ, янгылышабыз. Террорчулукъдан бугюн бирев де якъланмагъан. Мисалгъа Санкт-Петербург шагьарда болгъан вагьши террор ишни гелтирме сюемен. Шо саялы да бизге террорчулукъну алдын алывну оьзюбюзден башламагъа герек. Яшёрюмлени патриот ругьда тарбиялай туруп, биз уллу балагьланы алдын алмагъа болажакъбыз, – деди оьзюню сёйлевюнде С.Бийтемиров.

Фестивальны гьакъында айта туруп, онда яшланы инчесаният школасыны къуллукъчулары ортакъчылыкъ этгенни эсгермеге сюемен. «Тангчолпан» деген Россияны мердешли маданият цент­рында яшлар этген суратланы ва оюнчакъланы выставкасы да къурулгъан эди. Сагьнада «Тюзню ярыгъы» деген бийив ансамблни ортакъчыларыны къурч бийивлери, «Инжилер» деген йырав ансамблни «Биз дав болмагъанны сюебиз» деген йыры фестивальгъа айрыча ренк берди ва къаравчуланы уллу харс урувларын къазанды.

− Фестивальны оьтгере туруп, бизин алдыбызгъа яшёрюмлени патриот ругьда тарбиялавну, дослукъну, Дагъыстанны халкъларыны мердешлерин аявламакъны масъалалары салынгъан эди. Оьсюп гелеген яш наслуну халкъыбызгъа хас болгъан мердешлерде тарбиялай туруп, биз террорчулукъ ва экстремизмни алдын алмагъа болажакъгъа шек­лик этмеймен, − деди районну инчесаният школасыны директору Асият Халилова.

Фестивальны ахырында ону ортакъчыларына гьюрметлев грамоталар да тапшурулду ва эсделик суратлар алынды.

Герейхан ГЬАЖИЕВ.