ДР-ни савлукъ сакълав министерлигинден таба яшлагъа 42 путёвка гёрсетилген. Бабаюрт район больницаны ёлбашчыларыны гьаракаты булан 7– 14 йыллыкъ яшлагъа Сочи шагьарда ял алмагъа ва савлугъун беклешдирмеге имканлыкълар болдурулгъан.
– Бу пайдалы ва агьамиятлы ишде яшланы аврувларын багъагъан бёлюкню ёлбашчысы Къураш Жумакъазиевни гьаракатын ва чалышывун айрыча эсгерме тюше, – дей район больницаны баш врачы Жамина Алиева, – Къураш Ярашевич оьтген йылларда да яшланы Анапа шагьардагъы савлугъун беклешдиреген ва ял алагъан санаторийлеге бакъдыргъан эди. Бу йыл да районну яшлары Сочиде савлугъун беклешдирсин ва ял алсын учун, савлукъ сакълав министерликни кабинетлерине кёп чабып айланды десем де ялгъан болмас.
Савлугъу бек халкъ – пачалыкъны байлыгъы деген чакъырывну Бабаюрт район больницада яхшы англай. Февраль айны 27-синден март айны 18-не ерли бабаюртлу яшлар Сочиде ял да алды, культура чараларда актив кюйде ортакъчылыкъ этди ва савлугъуна къошум да болду. Ери гелгенде эсгерме герек, яшлар Сочиде ял алагъан гюнлер шагьарда къышлыкъ Паралимпия оюнлар оьтгерилеген гюнлер булан рас гелди. Яшлар оьзлени гёзлери булан тарихде агьамияты булангъы спорт ярышланы гёрмеге болду.
– Мени къызым Милана да бугюнлерде Сочи шагьарда савлугъун беклешдирди, – дей тамазатёбели Ирбайхан Девлетмурзаев. – Ата-аналаны атындан яшланы савлугъун ва ял алывун болдургъанлагъа баракалла деп айтабыз. Район больницаны ва район администрацияны ёлбашчыларына разилик билдиребиз.
Бэлла ГЬАЖИГЕЛДИЕВА.
