Алдындагъы гюнлер Буйнакск райондагъы инчесаният школагъа юрюйген уланланы, къызланы район администрацияны залыны сагьнасында гёрсетген гьюнерлери де оьрде мен айтгъан шо сёзлени гертилигин нече де арив исбат этди.
Биринчилей сагьнагъа инчесаният школаны Атланавулдагъысыны охувчулары чыкъды. Оланы «Атлан» деген ансамблини ортакъчылары бийиген кюйге къарап, залда олтургъан кёп адам тазза завх этди. Сонг яшланы бир гюбю арив йырлап алды. Къомуз чертеген яшлар Йырчы Къазакъны «Чатакъ йырыны» макъамын ким де сукъланар йимик сокъду.
Оланы арты булан чыгъып, Къумукъдагъы инчесаният школасыны охувчулары «Ватан» деген йырны янгыртып йырладылар. Бир нече яш къайтара агъачкъомузну бек арив «сёйлетме» бажарды. Накъыра, аргъан булан сокъгъан кюйлер буса бырынгъы заманлардан сес берген йимик болду. Сонг бирдагъы бир агьамиятлы агьвалат – мунда оьзюне Л. Абуева башчылыкъ этеген Къурчакъ театр ойнагъан кюй! Бийив ансамблни гьюнерлери де макътавгъа лайыкълы эди.
Тёбен Къазанышдагъы инчесаният школасына юрюйген къызлар сагьнаны къызыл гёбелеклердей бек исбайы этип къойгъан эди. Олар къумукъ бийивню бек уста кюйде бийиме бажардылар. Сонг З. Алкълычева фортепиано булан оьтесиз маъналы кюйде макъам сокъду. З.Камалутдинова буса Р. Гьамзатовну «Турналар» деген йырын ярыкъ тавуш булан оькюрюп йырлагъан кюйню халкъ ушатды. Сонг олардан бирлери теплер булан макъамлар чалды, бирдагъылары хор болуп «Буйнакск вальсны» гьеч бирев багьана тапма болмас йимик йырлады.
Гьасил чыгъарыв концертни жамы малим болгъан сонг, Атланавулдан С. Агьматовагъа, С. Халимбековгъа, Капиркъумукъдан С. Нажибаевагъа, Л. Абуевагъа, Тёбен Къазанышдан Гь. Абдулгьаниевагъа, А.Аселдеровагъа, Ж. Шугьайыбовагъа ва дагъы да оьзгелеге гьюрметлев грамоталар, китаплар савгъат этилди.
А. ЗАЛИМХАНОВ.
Суратда: къумукъ бийивню бийиген
Къазанышны инчесаният школасыны ортакъчылары.
