Оьтген 75 йылны узагъында бизин уьлкеде мердешли кюйде Физкультурниклени гюню белгиленип геле. Гьар заманда шо гюн август айны экинчи сонгугюнюнде белгилене. Бу йыл шо – август айны 13-не рас геле.

Бир де къопдурувсуз айтгъанда, эсгерилеген байрам гюн уллуну да, яшны да савлугъун беклеширив ва чыныкъдырыв булан байлавлу. Гьар ким де шо гюнню спортну гьар тюрлю журалары булан машгъул болуп майданчаларда жагьлы кюйде оьтгермеге тюшедир. Гьакимликни ерли къурумлары шолай болсун учун бир тюрлю имканлыкълар ярата.

Мисал учун айтгъанда, Магьачкъалада шо гюн «Савлугъу булангъы миллет» деген фес­тиваль оьтгерилежек. Бизин республиканы тахшагьарында яшайгъанлагъа ва гелген къонакълагъа шо гюн юрюлежек гьаракатларда халкъ арада спортну кёп къолланагъан журалырындан сынавларда ортакъчылыкъ этмеге имканлыкъ берилежек. Шондан къайры да, шо гюн къайырны уьстюнде ойналагъан волейбол ва футбол оюнлардан ярышлар болажакъ.

Дагъыстанны физкультура­гъа ва спортгъа къарайгъан­ министерлигини прес-къул­лугъу бизге билдирегени йи­мик, Физкультурниклени бю­тюнроссия гюнюне багъыш­лангъан шо гьа­ракатлар Е. Исин­­бае­ваны атындагъы стадионда ва Таргъу юртда юрюлежек.

Шо гьакъда айта туруп, би­зин республиканы бары да де­генлей уллу ва гиччи юртларында ва шагьарларында шо гюнге байлавлу гьаракатланы оьтгермеге гёз алгъа тутулгъанын айрыча эсгермеге тюше.