Заман гетип, 2023 — нчи йыл да тарихге айланажакъ. Гетип барагъан йылда гьар адамны яшавунда кёп заман эсинде къалагъан агьвалатлар болгъандыр. Шо якъдан алгъанда бизин юртларыбызны ва шагьарларыбызны жамият яшавунда да шатлы агьвалатлар аз болмады. Шолай, Тамазатёбеде юртлулар кёпден берли уллу сююнч ва сагъынч булан гёзлейген агьвалат болду.
Айтагъаным, уллу шатлыкъ мажлис оьтгерилип, юртда янгы жумамежит ачылып, пайдаландырывгъа берилди. Бу шатлыкъ гьаракатгъа Бабаюрт районну юртларындан, Магьачкъаладан, Хасавюртдан, Къызлардан ва оьзге шагьарлардан кёп санавда къонакълар гелген эди.
Янгы межитни бинасы оьзюню гёзеллиги ва аривлюгю булан юртну безей.
Булай арив тизилген межитни бинасына къарап, гёзюнг къувана ва сююне. Неге тюгюл, алдын ерли юртлулар намаз къылмагъа юрюп тургъан межитни бинасы, заман гетип, бузулма башлагъан эди. Юртну жамиятыны алдында тезлик булан янгы межитни бинасын къурмакъны масъаласы токътады.
Юртлулар оьзлени къолундан гелеген кёмегин болдуруп, инг алда болажакъ межитни кюрчюсюн салды. Амма межитни къурувгъа аслам къол ялгъагъан хасавюртлу далапчы улан Гьамзат-гьажи болду. Ол межитни бинасыны къурулушун бойнуна алып, уллу гьаракат гёрсетип, зувап иш этди.
Жумамежитни ачылывуна байлавлу оьтгерилген мажлисни барышында Тамазатёбе юртну гьакимбашы Магьач Имангьажиев, Ажабике-гьажикъатын Къазимагьамматова ва кёп оьзгелер Гьамзат-гьажини атына уллу баракалла ва исси сёзлер айтды. Юртлулар разилигин билдирип, Гьамзат-гьажиге шо гюн аргъумакъ савгъат этдилер. Бугюнлерде юртда имам болуп ишлейген Жумагелди-гьажи де межитни бинасыны къурулушуна къол ялгъагъанланы атларын айрыча гьюрмет ва абур булан эсгерди.
Янгы межитни бинасы янгыз юртну безеп къоймай, гьар даим де адамланы макънатисдей тартагъан ругьну ва къылыкъны, динни ва асил мердешлени сакълайгъан ожакъ болажакъгъа гьакъ юрекден инанабыз .
Бэлла ГЬАЖИГЕЛДИЕВА, Россияны журналистлерини
союзуну члени.
