Россияны Пачалыкъ Думасыны Федерал жыйыныны Федерация Советини председатели Валентина Матвиенко июль айны 11-нде ишчи сапар булан Дагъыстангъа гелген. Ону булан Пачалыкъ Думаны депутаты Ильяс Умаханов да болгъан. Къонакъланы Магьачкъаланы аэропортунда Дагъыстан Республиканы Башчысы Сергей Меликов къаршылагъан.
Валентина Матвиенкону бизге геливю «Дагъыстан Республиканы социал-экономика оьсювюне пачалыкъ якълав» деген гьукму нечик яшавгъа чыгъарылагъаны булан ювукъдан таныш болмакъ ва шогъар тергев юрютмек булан байлавлу. Гетген йыл Федерал жыйынны Федерал Советинде «Дагъыстанны гюнлери» оьтгерилеген вакъти шо гьукму къабул этилген болгъан.
Сапарыны вакътисинде В. Матвиенко Магьачкъалада бир нече социал идараларда болгъан ва Дагъыстанны социал-экономика оьсювюне байлавлу аслу масъалаланы чечиливюню гьакъында генгеш оьтгерген. Ол инг башлап республиканы ватандашларын оьтген Къурбан байрам булан къутлагъан, Россияны Игити Нурмагьаммат Гьажимагьамматов охугъан школада болгъаныны гьакъында айтгъан.
В. Матвиенко англатгъан кюйде, Федерация Совети Дагъыстанны четим масъалаларыны гьайын эте, оланы тюзевлю чечиливюне байлавлу ёллар излей.
«Коррупция булан байлавлу ишлени тамурундан къыркъма тарыкъ. О тот басгъан «аврув» республиканы бары да тармакъларына яйылгъан. Инвестиция онгайлыкъланы да тынч къайдада иш юрютме болар йимик къурма тарыкъ», – деп билдирген В.Матвиенко. Ол англатгъан кюйде, коррупцияны ёкъ этмей туруп, рес-публикагъа бизнес ва инвесторлар гелмежек. Шо саялы янгы промышленный предприятиелер, экономиканы оьсювюн болдурагъан янгы къурулушлар болмажакъ.
Бирдагъы масъала осал чечиле. Дагъыстан Россияда тувагъан яшланы артыву булан алгъа чыкъма сюйсе де, яшлар бавланы къурулушлары булан артда къала.
Дагъыстанны геополитика онгайлы шартлары ерли аэропортну ва де-нгиз портну да имканлыкъларын артдырма тарыкъ экенни англата. Денгиз порт санкцияланы вакътисинде дагъы да артыкъ пайдалы болма тарыкъ.
Дагъыстангъа багьалы къонакъюйлер булан бирче орта яшав юрютегенлени де киселерине къыйышагъанларын да къурма тюше. Туризм тармакъланы имканлыкъларын артдырма герек.
Генгешни барышында регионну Башчысы Сергей Меликов санкцияланы вакътисинде Дагъыстан нечик иш гёрегенни гьакъында айтгъан. Экономиканы оьсювюн болдурувну оператив штабы къурулгъанны эсгерген. Гьукуматны Председатели Абдулмуслим Абдулмуслимов да доклад булан чыгъып сёйлеген. АПК-ны ишини гьакъында, оьзге тюрлю гьаракатланы, четимликлени гьакъында англатыв этген.
Пачалыкъ Думаны Федерал Советини спикери Фазу Алиева яшайгъан уьйню тамына эсделик языву булангъы такъта илинегенге байлавлу хас чарада да ортакъчылыкъ этген ва чыгъып сёйлеген. Ол эсгерген кюйде, Фазу Алиева – Дагъыстанны тюгюл, Россияны да макътавлу этмеге чалышгъан уллу шаирлени бириси. Сергей Меликов билдирген кюйде, бу йыл «Фазу Алиеваны йылы» ва сав йыл Дагъыстанны халкъ шаирини 90 йыллыгъы оьтгериле туражакъ. Гелеген йыл да бирдагъы Дагъыстанны халкъ шаири Расул Гьамзатовну 100 йыллыгъы оьтгерилегенин эсгерген.
Валентина Матвиенко Сергей Меликов булан бирче Дербент шагьаргъа да баргъан. «Нарын-Къала» бекликге къарагъан ва ону тарихи булан таныш болгъан.
