Къарабудагъгент юртдагъы гимназияны охувчулары «Алимни янында къонакълыкъда» деген Бютюнроссия проектни яшавгъа чыгъара туруп, Магьачкъаладагъы Дагъыстан пачалыкъ университетде къонакълыкъда болгъан. Бу сапарны аслу мурады – охувчу яшланы илмугъа ва янгы технологиялагъа муштарлы касбу танглама, илму-техникагъа гьасиретлигин артдырма кёмек этмек.
Охувчу яшлар бу оьр охув ожакъны илму лабораториясында, планетарийинде, аквакомплексинде, гьар тюрлю факультетлеринде болгъан. Университетни алимлерини янгы илму ишлери булан таныш болгъан. Университетни ректору М.Рабаданов булан ёлукъгъан. Сонг оьзлер охуйгъан гимназияны битдирген ДР-ни Халкъ Жыйыныны депутаты, университетни проректору Алимурат Гьажиев булан ёлукъгъан. «Дёгерек столну» айланасында болгъан лакъырлашывда охувчу яшлар оьзлени илму ахтарывларыны гьакъында хабарлагъан. Университетни алимлери юрютеген янгы илму ахтарывлагъа тынглагъан.
Оьз янындан районну администрациясы охувчу яшлагъа этилген пайдалы экскурсия учун ДГУ-ну ёлбашчыларына баракалла билдирген.
Я.БИЙБОЛАТОВ
