Алдагъы гюнлерде Уьзбекистанны тахшагьары Ташгентде спорт­ну бокс журасындан дюньяны гезикли чемпионаты тамамланды. Белгили экени йимик, лап сынавлу спортчулар тогъатартгъан шо ярышларда эки дагъыстанлы инг гёрмекли оьрлюклеге етишмеге бажаргъан. Ачыкълашдырып айтгъанда, 86 кило авурлукъда Шарабутдин Атаев ва 92 кило авурлукъда Муслим Гьажимагьамматов алтын медаллагъа лайыкълы болду.

Оьзюне 23 йыл тюгюл битмеген къумукъ улан Шарабутдин Атаев – миналы дёргелили. Ол яш ­ чагъына да къарамайлы, лап оьр даражада оьтгерилеген ярышларда «уьстюнлюкню татывун» сезген деп айтмагъа ярай. Али Алиевни атындагъы Олимпия гьазирлигини спорт школасында тренерлери Солтан Мигитиновну ва Рашитбек Агьматовну алдында тарбияланагъан вакътини ичинде ол Россияны чемпионатларында гюмюш ва бронза медаллагъа ес болгъандан къайры, эки керен алтын медаль да къазангъан.

Нап чыгъарагъан пачалыкъланы инг тизив спорчулары къуршалып оьтгерилеген чемпионатда да алдынлыкъ алгъан. Шондан къайры да, бизин республикада, уьлкеде ва ондан тышда да юрюлген кёп санавдагъы ярышланы алдынлысы гьисапда белгили болгъан. Ол Россияны спортуну халкъара даражалы устасы да дюр.

Булай алгъанда буса, Шарабутдин Атаев ортакъчылыкъ этген дюньяны экинчи чемпионаты гьисаплана. Инг алда, 2021-нчи йылда, Белград шагьарда оьтгерилген дюньяны чемпионатында ол оьзю булан тогъатартмагъа чыкъгъан Азербайжан учун ябушагъан кубалы спортчу Лорен Альфонсо Домингесни енгмеге усталыгъы да, бажарывлугъу да етишмей къалгъан. Шо заман Сербиядан Альфонсо дюньяны чемпиону болуп къайтгъан.

Бу гезик дюньяны чемпионатыны бары да тиретлеринден ­уьстюнлю кюйде оьтген. Ярышланы финал тиретинде буса ол, баягъы, Лорен Альфонсо Домингес булан бетге-бет ёлукъгъан. Касбучулар эсгерегени йимик, оьтгерилген ябушувну башлапгъы мюгьлетлеринден тутуп, Шарабутдин Атаев майданчада онгайлы кюйде ерлешип, оьзю булан тогъатартмагъа чыкъгъан спортчуну къувуп, тарлыкъгъа салып тура. Тогъатартывну экинчи бёлюгюнде Лорен Альфонсо Домингес къастын гючлендирсе де, бизин спортчугъа гюч этмеге болмай. Ябушувну уьчюнчю тиретинде буса, оьзю булан то­гъатартмагъа чыкъгъан спортчуну гьалсыз этип, Шарабутдин алгъа талпынып, авурлугъун гётермеге болмасдай огъар гюч этген.

Шолайлыкъда, ябушувну барышына тергев этип турагъан судьяланы гьарисини айрыча берген къыйматына гёре, Шарабутдин Атаевге алдынлыкъ берилген. Шарабутдин Атаев Сербияда юрюлген дюньяны чемпионатында оьзюн утгъан Лорен Альфонсо Домингесден пайын алгъандан къайры, ол уллатасына берген антын да кютген. Айтагъаным, дюньяны чемпионатыны финал тиретинде ябушув тамамлангъан сонг маълумат къуралларыны мухбирлерине баянлыкъ берегенде ол билдиргени йимик, лап гиччи чагъындан тутуп, ата юртундагъы спортзалгъа юрюмеге башлагъан. Шо заман ол уллатасыны тилевюне гёре огъар: «Мен чемпион болажакъман!» – деп де сёз берген болгъан.

Биз де ону дюньяны оьлчевюнде оьр даражада юрюлеген ярышларда етишме болгъан ­уьстюнлюгю булан газетни къуллукъчуларыны ва бары да охувчуларыны атындан гьакъ юрекден къутлайбыз. Ол гележекде оьзюню оьрлюклери булан янгыз дос-къардашын тюгюл, бары да халкъны да сукъландырып, сююндюрюп туражагъына инанабыз.