Къазан шагьарда шу меселде студентлени ёлугъуву 7-нчи керен оьтгериле. Бу йыл юрюлген конференцияда «Студентлени гёзюнден къарагъанда, оьр охув ожакъларда билим беривню сан яны» деген теманы айланасында пикру алышдырыв болгъан. Яш наслуну арасында шо масъалагъа тергев бакъдырылгъаны да негьакъ тюгюл. РФ-ни яшёрюмлерини сиясатына къарайгъан департаменти ва Къазан университетни студентлерини жамият къурумларыны ва бирлешивлерини координация совети гезикли конференцияны оьтгеривню сиптечилери болгъан. Россияны 50-ден де артыкъ оьр охув ожагъындан гелген студентлени, дарс беривчюлени санаву 170-ге ювукъ болгъан.
Конференцияны ишинде Да­гъыстан пачалыкъ университетни математика ва компьютер илмуланы уьйретеген факультетини студент къызы Заира Гилалова ва экономика факультетде охуйгъан Завур Агьматов ортакъчылыкъ этген. Ёлугъувну барышында лекциялар охулгъан, мастер-класлер юрюлген ва «дёгерек столланы» айланасында пикру алышдырывлар оьтгерилген. Конференцияны ортакъчыларына эки секциягъа бёлюнюп ишлемеге имканлыкъ болгъан. «Россияда илму ва билим тармакъланы оьсювюнде студентлени ва яшёрюмлени бирлешивлерини агьамияты» ва «Оьр билимлени сан янын артдырывда студент бирлешивлени ортакъчылыгъы» деген эки тема конференцияны барышында арагъа салынып ойлашылгъан.
Гелген къонакъланы алдына чыгъып Къазан федерал университетни президенти Мякзюм Салахов, РФ-ни Пачалыкъ Думасыны депутаты Илдар Гилмутдинов, студентлени жамият къурумларыны ва бирлешивлерини Координация советини ёлбашчысыны орунбасары Олег Туманов сёйлеген.
Эки гюнню ичинде студентлер стипендия беривню, тарбиялавну гьакъындагъы масъалаларын арагъа чыгъарып, «дёгерек столну» айланасында пикру алышдыргъан, мастер класлар гёрсетген. Ондан къайры да, конференцияны ортакъчылары Къазан шагьарны тарихи ерлерине сапар этген.


Дагъыстан пачалыкъ университетни прес-къуллугъу.
Суратда: конференцияны ортакъчылары.