Гюз явунлардан сонггъу хавланы къышны къары яшыра, къышдан сонг язбашны исси гюнлери буса ача. Шону учун 1-нчи ва 9-нчу май байрамланы алдында, бизин уьлкени шагьарларында, юртларында адатланып къалгъан яхшы мердеш — жамият булкъалары оьтгериле.

Апрелни 22-нде, жумагюн, Къаягент районну баш юрту гьисапланагъан Янгы Къаягентде де булкъа оьтгерилди.

Тюшашны вакътиси бите туруп, Къаягент районну гьакимиятыны алдындагъы майдангъа иш опуракълар булан гийинген къатынгишилер, эр­гишилер жыйылмагъа башладылар. Себеби – тюш вакътиден башлап, район центр язбашгъы байрамланы алдында болагъан булкъа оьтгерилегенлиги. Биз билеген кюйде, Янгы Къаягентде онлар булан район къурумлар, идаралар, билим берив, охутув, ярыкъландырыв ожакълар ерлешген. Буланы гьарисинде онлар булан къуллукъчулар чалыша. Мен район админист­рацияны абзарына гиргенде, башлап гёзюме «Газель» машин ва ону айласында жыйылгъан адамлар илинди. Ювукъ гелгенде район администрацияны хозяйство бёлюгюню ёлбашчысы Магьамматсайит­ Багьандов ва ону булан бирге ишлейген Аминат Къазылова къаршылашдылар. Машинден ва ювукъдагъы склад уьйден предприятиелени, къу­румланы, идараланы, ожакъланы вакиллери ишде тарыкъ болагъан беллени, се­неклени, сырлав акъчабыв материалланы къабул эте туруп табулдулар.

Узакъ къалмай «Кавказ-217» уллу ёлдан башлап, Ян­­гыкъаягент темир ёл стан­цияны алдындагъы майдангъа ерли аралыкъда иш къайнамагъа башлады. Сонг ондан да оьтюп, тазалыкъ болдурувчулар юртну баш орамы булан темир ёлну ари бетине, полицияны район бёлюгюне элтеген ёлгъа чыкъдылар.

Тазалыкъ болдурагъанла­ны арасында «Къаягент район­» деген муниципал къуру­муну башчысы Магьаммат Ма­житович Элдерха­нов къар­­­шылашды.

− Май байрамланы алдында тазалыкъ болдурмакъ мурат булан оьтгерилеген булкъалар бизде тезден мердешге айлангъан. Биз савлай апрель айда районну ичиндеги бары да юртларда тазалыкъ болдурувну чараларын гёрдюк. Янгы Къаягентдеги булкъа буса − оланы барысыны да жамын чыгъарагъанда йимик. Сиз гёресиз, райцентрда ерлешген бары да предприятиелени, къурумланы, идараланы, ожакъланы 100-ден къолай къуллукъчулары, иш­чилери къурумлу кюйде орамлагъа, райцентрдагъы майданлагъа чыкъгъан ва тазалыкъны болдуралар. Биз оланы загьматына разибиз, айырып яхшыланы атларын айтмагъа да сюймейбиз. Бу­гюн осаллыкъ этгенлер болмады, — деп сёзюн бёлдю М. М. Элдерханов.

Гертиден де, райцентрны не ерине барсанг да, иш опуракълар гийип, белсенип тереклеге, биналаны тамларына акъчабагъан къатынгишилени, насланы самосвал автомашинлеге юклейген эргишилени гёребиз. Ондан къайры да, иш булан бирге йыбав, масхаралар, кюлкю булкъаны шатлыкъ байрам булан тенг этер даражада эди. Иш гьаракатны натижалары яман болмады.

Булкъада районну гьакимиятыны башчысы М. Элдерханов предприятиелени, къурумланы, идараланы, ожакъланы ёлбашчыларыны, иш коллективлерини алдына салгъан, бары да юртларда байрам гюнлени алдында мекенли тазалыкъ болдурув масъала чечилди.

Магьаммат-Расул ИБРАГЬИМОВ.
Къаягент район.