Алдагъы гюн рак аврувлагъа къаршы гьаракатны гюнюне байлавлу болуп Дагъыстан Республиканы онкология центры кёкюрек хирургия булан бирге 2019-нчу йылны гьасиллерине гёре коллегияны жыйынын оьтгерген. Шо жыйынны Дагъыстанны савлукъ сакълав министри Жамалутдин Гьажиибрагьимов юрютген.

Бугюнлеге ерли Россияда онкология аврувлар къатнагъан 3, 7 миллиондан да артыкъ адам бары ачыкъ болгъан. Дагъыстанда буса   шо намарт аврув къатнагъан 28 мингден кёп   адам гьисапгъа алынгъан.

Мисал учун, 2019-нчу йылда биринчилей рак аврув къатнагъан 4875 адам арагъа чыкъгъан. Шо буса алдагъы йыл булан тенглешдиргенде, 59 адамгъа кёп болгъан. Шогъар да къарамайлы, савлай Россияда, орта гьисапда алгъанда, Дагъыстанда яман аврувдан авруйгъанлар аз демеге ярай.

Бизин республикабызда аслу гьалда оьпкелеринде рак аврув болуп оьлегенлер биринчи ерде, экинчи ерде ашкъазанына, уьчюнчю ерде буса кёкюреклерине къабунуп гечинегенлер, олай да, шо намарт аврув ичеклерин къыйнап оьлегенлер дёртюнчю ерде экени ачыкъ болгъан.

2019-нчу йылда Дагъыстандагъы онкологлар чакъ-чакъда гьар ерлеге барып, адамланы тергеп, шо аврувну заманында ачыкъ этмек учун иш гёргенлер. Шону натижасында адамны санларына чалтлыкъда яйылып, кёп уллу зиян гелтиреген аврувну башлапгъы вакътисин белгили этген гезиклер де аз тюгюл.   Янгы, санлы технологияланы, УЗИ-ни къоллап, гьазиринде оьтгерилген тергевлени яхшылыгъындан шо аврув терен яйылгъанча алдын алмагъа да бажарылгъан.  

Дагъыстанны савлукъ сакълав министри белгилеген кюйде, участка медицина къуллукъчулар рак аврувну алдын алмакъ учун оьтгереген чараларын яхшылашдырса, дагъы да гёрмекли натижалагъа етишме болажакъ. Ол бу йыл участка къуллукъчуланы янындагъы гьаракатны гючлендирме герек деп онкология центр­ны ёлбашчыларына тапшурув берген.

Ондан къайры, химиятерапияны эркин къолланагъанына гёре, Дагъыстанда медицина кёмек уьстюнлю кюйде юрюлегени де ачыкъ этилинген. Сонг да, адамланы савлугъун тергемек   муратда гьар айны ахырынчы сонгугюнюнде Республика онкология центрда «Ачыкъ эшиклени гюнлери» деген гьаракат оьтгериле.

Жыйынны ахырында савлукъ сакълав министри Ж. Гьажиибрагьимов онкология аврувлагъа байлавлу гьалны яхшылашдырмакъ учун, онкология центрда, ерлердеги онкологиядан кёмек этеген амбулаторияларда янгы ерлер ачма герекни гьакъында эсгерген. Министр бу масъаланы ёрукъгъа салывда врачлардан, медицина къуллукъчулардан кёп зат гьасил болагъанын да айтгъан.