– Охувчу яшлагъа бир йимик гийимлер юрютмек таклиф этилежек деп айтыла, шо герти хабармы?

– Шолай масъаланы Россияны билим берив министерлигини алдына министрни орунбасары Андрей Корнеев салгъан.
«Охувчу яшлагъа школада тобукълары ачылгъан жынслар, сылангъан яда къаркъарасы кёп ачылагъан гийимлени юрютме тюшмей. Шону учун да бир къайдадагъы гийим токъташдырма герек», – деп таклиф этген.
Шолай гийим тарыкъмы яда тарыкъ тюгюлмю, масъаланы ерлерде чечежек, тек бугюнлерде яшлар дарслагъа бир йимик гийинип 37 регионда геле.
Россияны билим беривюню министри Сергей Кравцов билдиреген кюйде, та­лаплар янгыз опуракъгъа болажакъ, чачыны тюсюн алышдырагъанланы гьакъында айтылмагъан. Шо масъаланы ата-ана чечежек.
«Тюп ян – къара, уьст ян – акъ» къайда яшлагъа бек арив ярашагъанны гьакъында да хабар бола.
* * *
– Мени айрылгъан эрим хас асгер гьаракатда ортакъчылыкъ эте буса, яшлагъа алимент тёлеме герекми яда шо заманлыкъгъа токътатыламы?

–Яшгъа алиментлер къайсы ата да тёлеме герек, башгъалыгъы ёкъ, ол не ердедир, не булан машгъул ва къачан къайтажакъ. Берме герек чакъы акъча асгер къуллукъчуланы гелиминден, алапасындан тутула.
Шо гьаракатда ортакъчылыкъ этегенлер къалгъан тёлевлерден заманлыкъгъа эркин этиле.
* * *
– Оьз ишимни ачмагъа ва далапчылыкъ юрютмеге башлама тартынып тураман. Гьали ачып юрютмек пайдалымы?

–Бир башлап далапчылыкъ булан машгъул болгъанча, гьар адам план къуруп къарама герек. Далапчылыкъны пайдасы болмай къалмай. 2019-нчу йылдан берли 7 миллион адам оьз иши булангъы ерлер ачгъан ва пайдалы ишлеп туралар.

Гьисап бермей, аз даражадагъы налоглар булан ишлеме ихтиярлар бериле. Дыгъар булан башгъа ишлени юрютме де имканлыкъ болажакъ.

Гьар гюн далапчылыкъ булан машгъул болма сюегенлени санаву 7500 адамгъа арта.
Аслу гьалда далапчы ишлеге гьисапгъа алынагъанлар – сатыв-алыв юрютме сюегенлер, такси гьайдайгъанлар, оьзю болдургъан малланы сатагъанлар, маллар ташыйгъанлар, квартирлерин ижарагъа берегенлер яда буса техниканы ярашдырагъанлар кёп къаршылаша.

Шолайлардан толу кюйде налог тутув 2029-нчу йылда башланажакъ.

* * *
– Мен ипотекагъа квартир алгъан эдим, гьали сатма сюемен. Шону нечик этсе яхшы?

– Сатывну неден башлама герек? Шону 3 къайдасы бар:
1. Квартирни алма сюеген адам алгъанча сени кредитингни тёлей.
2. Сен квартирингни ипотекасы булан сатасан.
3. Сени квартирингни сатмагъа банк ­оьзюню бойнуна ала.
Квартирингни алагъан адам ипотекангны къалгъан гесегин япмагъа акъча бере буса, банк шону сатмагъа ихтияр бере.
Толу кюйде шону гьакъында тюпдеги маълуматдан билме бола: https://fincult.info/article/kak-bezopasno-provesti-raschety-pri-pokupke-ili-prodazhe-zhilya/).

Телеграм каналны «Объясняем. РФ» деген бёлюгюнден алынгъан.