Тюнегюн Магьачкъалада Уллу Уьстюнлюкню 77 йыллыгъына багъышлангъан ТОКС-ну 51-нчи слёту ва «Эсделикни вахтасы» деген ватандаш гьаракат оьтгерилген. Шо чарада Дагъыстанны Башчысы Сергей Меликов да ортакъчылыкъ этген.

 Гьаракат шагьарны уллу майда­нында башлангъан. Ветеранлар, ТОКС-ну, ДОСААФ-ны, «Юнармияны» ва «Уьстюнлюкню волонтёрлары» гюп­лешип, къолларында байракълары, шарлары, гюллери ва оркестрны согъуву булан Ленинни атындагъы «Азатлыкъ гелтирген солдатны» эсделигине багъып юрюшюн башлагъан.

Митинг башлангъанча, С. Меликов Уллу Ватан давда жанларын къурбан этгенлени эсделигине гюллер салгъан.

– Бютюнроссия ахтарывчу гьаракат кёп йыллар алда къурулгъан. Олар оьтген заманны ичинде минг­лер булангъы белгисиз тас болгъан деп гьисап этилинеген адамланы тапгъан ва дос-къардашына билдирген. Олар давда ортакъчылыкъ этгенлени эсделигине уллу гьюрмет этелер, – дей Сергей Алимович. – Дав рагьмусуз, онда миллионлар булан адам оьле, къурулушлар бузула, юреклеге къолай болмас яра сала. Уллаталары, уланлары, эрлери, аталары Уллу Ватан давда ортакъчылыкъ этмеген бир агьлю де ёкъдур. Дагъыс­тандан шо давда 180 мингге ювукъ адам ортакъчылыкъ этген, яртысындан кёбю дав майданларда къалгъан. Шолардан да 46 минги белгисиз тас болгъан. ТОКС-ну ортакъчыларына инсаплы ишин юрютегени учун баракалла билдирме сюемен. Биз давда ортакъчылыкъ этгенлени игитлигин бир де унутмажакъбыз ва уллу гьюрмет булан эсгерип туражакъбыз. Оланы игитлиги ва эсделиги Ватаныбызны сюйме гюч бере.

Бир-бир пачалыкълар тарихни янгыдан язма сюе, тек Уьстюнлюкню бизин асгерлер гелтиргенни унутма тюшмей. Дагъыстанлы офицер Россияны Игити Нюрмагьаммат Гьажимагьамматов шолай уллаталарыбызны игитлигинден уьлгю алгъан. Огъар ошагъан кёп намуслу уланлар Украинада хас асгер операцияны оьтгеривде ортакъчылыкъ этип туралар.

Дагъыстанны ветеранларыны со­­ветини председатели Магьаррам Алижанов да, гьалиги наслу да оьз­лени дав юрюлеген бойларда осал гёрсетмейгенни ва оларда уллаталарыны ругьу барны айтды.

Шолай да, митингде ТОКС-ну, денгиз кадет школаны ва «Уьстюнлюкню волонтёрлары» деген гьаракатны вакиллери де сёйледилер.

Бизин мухбирибиз.