Школаны абзары шарлар, гюллер, плакатлар булан арив безендирилген. Байрамча гийинген муаллимлер, охувчу яшлар ахырынчы зенгге гьазир бола. Школада уллу жанланыв.

Абзарда тизилген охувчу яшлар, къызлар, муаллимлер, ата-аналар ахырынчы зенгни башланывун къаравуллап токътагъан. Муна юрекге арив тиеген юваш макъам согъула. Байрамны юрютеген охувчу къызлар биринден-бири алып шиърулар охуй. Олар ахырынчы зенгге, яшлыкъгъа, гележекдеги умутлагъа, муаллимлеге багъышлана. «Школаны йыллары» деген йыр йырлана. Школаны охуп битегенлер чыгъып тизиле. Россияны ва Дагъыстанны гимнлери согъула. Жыйылгъанлар бары да гимнлени йырлай. Кахулай школаны 11-нчи класын битдиреген, 8, 9-нчу класын битдиреген 18 охувчу бар. Сегиз де охувчугъа бугюн оьзлеге билим берген, яшав дарсларын берген, рагьмулукъгъа уьйретген, къурдашлар тапма кёмек этген школадан айрылма тюше.

Школаны директору Магьаммат Ихласовгъа сёз бериле.

–Бугюн бизин школаны битдирегенлер учун ахырынчы зенг къагъыла,–деди ол.– Сиз охугъан заманны ичинде школаны педагогика коллективи билим ва тарбия бермек учун къаст этип ишледи. Сиз оьзюгюз де къаст этип билим алма къарадыгъыз. Шону учун сизге баракалла билдиремен. Мени сизге ёравум, школада алгъан билимлеригизни аягъыз, толумлашдырыгъыз, муаллимлер берген насигьатланы унутмагъыз. Яшавда олар сизге кёмек этежек. Бирлеригиз 9-нчу класны, бирлеригиз 11-нчи класны битдиресиз. Янгы яшавда сизге тынч да болур, къыйын да болур. Бир-биригизни тутуп, бир-биревню англап, кёмек этип, ата-анагъызны, къардашларыгъызны, элигизни сююп яшагъыз. Шо заман сизге къыйынлыкълар кар этмес. Сизге энниден сонг да билимлеригизни артдырма герек, гьаригиз оьзюгюз танглагъан касбулагъа ес болма насип болсун. Гьаракат тарыкъ. Эринмей охугъуз, эринмей ишлегиз. Шолай этсегиз, сизин яшавугъуз да, ата-анагъызны, къардаш-досну, савлай элибизни яшаву да тюрленежек, яхшы болажакъ. Ата-анагъа да айтаман. Яшларыгъызгъа гьайлы болугъуз. Олар уллу болгъан деп оьз эркинине къоймагъыз, ёл гёрсетигиз, тергевню тюбюнде сакълагъыз. Барыгъызгъа да гележекде савлукъ, узакъ оьмюр ва умутларыгъызгъа етишмекни ёрайман.

Ондан сонг Кахулайны администрациясыны башчысы Шамил Къадиевге сёз берилди. Ол охувчу яшланы школаны битгенлиги булан къутлай туруп, олагъа насигьатлар берди, оьзюню ёравларын айтды.

Магьачкъаланы Совет районуну администрациясыны вакили Магьаммат Магьамматов да охувчулагъа оьзюню ёравларын айтды. Сёйлевлер булан аралашдырып, охувчу яшлар школаны директору Магьаммат Ихласовгъа, оьзлени охутгъан муаллимлеге оьзлер язып багъышлагъан шиъруларын охуй туруп, гюл байламлар да тапшурду.

Охувчу къызланы «Кахулай» деген ансамбли къумукъ бийивню бийип, жыйылгъанланы харс урувларын къазанды. Яшланы хору йырлагъан йырлар да гелгенлени гёнгюн алды. Дёртюнчю класда оьр къыйматлар булан охуйгъан дёрт охувчугъа медаллар ва дипломлар тапшурулду.

Ахырынчы зенгни байрамын къурумчулукъ якъдан Индият Алиева бек къужурлу кюйде онгар­гъан эди. Бу байрам яшланы, айрокъда школаны охуп битген охувчуланы эсинде даимге къалажакъ деп айтма ярай. 12-ден сонг охувчулар Магьачкъаланы денгиз ягъадагъы Родоп бульварына барма гьазирлене къалдылар.

Яраш БИЙДУЛЛАЕВ.