Къызылюртда шагьар администрациясыны янында ерлешген ял алывну бавунда жанланыв гьис этиле эди. Мунда шагьарлылар Россияны Президентини сиясатын якълавгъа байлавлу чарада ортакъчылыкъ этдилер.
Донбассда юрюлеген хас операцияда ортакъчылыкъ этеген россиялы асгер къуллукъчуларын якълавгъа байлавлу чара запасдагъы офицерлени сиптечилигине гёре оьтгерилди. Шо сиптечилик жамият къурумланы вакиллерини, шагьар жыйынны депутатларыны, охув ожакъларда билим алагъан студентлени, охувчуланы ва шагьарлыланы арасында якълав тапды. Эсгерилген чарада ортакъчылыкъ этмек учун Къызылюрт районну вакиллери ва загьматчылары да гелген эди.
Бу чараны ортакъчыларыны къолларында Россияны гьакимиятыны сиясатын якълавгъа байлавлу чакъырывлар гёрюне ва шагьарны ва районну ватандашларыны бирлигин бирдагъы керен гертиледи.
Къызылюрт шагьар округну башчысы Магьаммат Магьамматов чараны ишин гиришив сёз булан ачды. Ол болдургъан бирлиги ва патриотчулугъу саялы шагьарлыланы атына разилик сёзлер айтды.
Чыгъып сёйлегенлер Къызылюрт шагьар округну, Къызылюрт ва Хумторкъали муниципал районларыны военный комиссары Шейхсайит Магьамматов, Къызылюрт районну администрациясыны башчысы Рустам Татарханов, Дагъыстанны къатынларыны советини ортакъчысы Светлана Алибекова, «Патриоты» деген Афгъанистанда интернационал борчун кютген ветеранларыны Советини ортакъчылары РФ-ни Президентини сиясатын якълавда бирикмеге чакъырдылар.
