Талатгюн, 20-нчы июнда, академик Гьамит Агьматович Бучаев булан редакцияда ёлугъув болду. Шонда «Дагъыстан» деген басмахананы ёлбашчысы Умаросман Гьажиев, алим, социолог Загьит Абдуллагьатов, шаир, «Тангчолпан» журналны редактору Супиянат Мамаева, «Ёлдашны» баш редактору Гебек Къонакъбиев ортакъчылыкъ этди.
Гьамит Агьматович оьзюню сёйлевюнде къумукъ ана тилни школалардагъы бугюнгю четим масъалаларыны гьакъында хабарлады. З.Абдуллагьатов газетибизни «Спутник» деген къошумунда чыкъгъан «Мой материнский кумыкский язык: современные угрозы» деген макъаласында ана тилни масъалаларын герти кюйде ахтарып, билип язгъанны эсгерди. Шогъар байлавлу газетни бетлеринде пикру алышдырывлар этсе пайдалы болажагъын айтды.
Ёлугъувда ортакъчылыкъ этген ёлдашлар да гьариси ана тилни масъалаларыны айланасында оьзлени пикруларын айтдылар.
