Москвадагъы  стадионунда "Локомотивни" къаравчуларындан, къонакъ гелген команда "Анжини" къаравчуларыны кёплюгю, олай да оланы бизин команда бу оюнну утмаса да утдурмас деп  инанагъанын гёрсетди.
Оюн битген сонг майданны есилерини стадионуну таблосунда   "Локомотив" – "Анжи" 4:0 деп янагъан языв, бир де къопдурувсуз айтгъанда, Москвадагъы сувукъда бизин команданы якълама гелген дагъыстанлыны юрегин бузуп къарсалатды.

Бизин команда бу оюнгъа мекенли гьазирлигин, бешинчи минутдагъы 2:0 санав герти кюйде исбатлады. Уьчюнчю ва дёртюнчю минутда "Локомотивни" чапгъынчысы Майкон, " Анжини " якълавчуларыны янгылышларындан пайдаланып, Беленовну къапусуна эки топ гийирди. Эсер-месер болгъан бизин команда, ёлугъув битип къалгъынча оьзюню оюнун гёрсетип болмады. Биринчи таймны ортасында, Обертан майданны есилерини къапучусу булан янгыз бетге-бет чыгъып, топгъа уруп ону гёнделен багъанагъа тийдиргенинден къайры, сав оюнну ичинде бизинкилер бир къоркъунчлу мюгьлет сама тувдуруп болмады.

 Шолай оюнну биринчи таймы 2:0 санав булан битди.

Экинчи тайм башланып аз да гетмейли, 30 метрдан ургъан Фернандешни тобун, бизин къапучу Беленов къолларыны аялары булан гери ураман деп, къангдырып, оьз къапусуна бакъдырып санавну 3: 0 этди. Шо голдан сонг оюнну битдирип къойма да ярай эди. Не артгъа салгъан оюнчуланы скамейкасындан оюнгъа чыкъгъан Бериша, не къаравчулар, не тренерлер булан оьзлер футболистлер  шо заман "Анжи" бу оюнну къутгъарып бажарар, деп ойлашмайгъаны мекенли эди. Шондан къайры да, якълавчуларыбызны бириси штрафнойну ичинде "Локомотивни" ярым якълавчусу Янбаевни чатакъ салып йыгъып, бизин къапугъа он бир метрлик пенальти де "къазанды". Пенальтини Александр Самедов уруп мурадына етишди. Шолайлыкъда, оюнну санаву 4:0 болду. Шолай оюн да битди.  Черкизовогъа шо гюн жыйылгъан Москвада яшайгъан дагъыстанлыланы "Анжи" ачыкъдан-ачыкъ айтгъанда уялтды.

Шарабутдин КИШИЕВ.