Россия Федерацияны Пачалыкъ Думасыны Дагъыстандан сайлангъан депутаты, «Трезвая Россия» деген гьаракатны ёлбашчысы Солтан Гьамзаев билдирген кюйде, регионланы ёлбашчыларыны ишине багьа берегенде оланы эсиртеген ичгилеге къаршы юрютеген ишин де гёз алгъа тутма тарыкъ.
Шо гьакъда айта туруп, депутат С. Гьамзаев бир нече гюн алда Президент Владимир Путин Киров областны губернатору булан лакъыр этегенде огъар регионну халкъы эсиртеген ичгилени къоллайгъан кюйге де тергев эте турмакъны тапшургъанны эсгерген. Гертиден де, Россияны бир-бир ерлеринде адамлар ичкини гьатдан озуп къоллай. Шону учун да ватандашланы савлукъларына зиян гелтириле.
«РФ-ни субъектлеринде оьр къуллукълагъа къуршалгъанланы ишини сан янын къыйматлайгъанда, Эсиртеген ичгилеге къаршы гьаракатыны асувлугъу дегенин де къошма тарыкъ. Олай демек, ички сатагъан тюкенлени аз этип къоймайлы, жинаятчылыкъны да, ичип машин гьайдайгъанланы да, ичкиден агъуланагъанланы да, уьйлеринде гьаракъы гьазирлейгенлени де санавун аз этежек», – деп билдирген Солтан Гьамзаев.
Ол бирдагъы эсгерген кюйде, бир-бир регионларда ичкиден оьлегенлени санаву тюз юрюлмей. Шо ерин яшырып гёрсетелер.
