Шамил Магьамматович Зай­налов – районунда чы нечик де, савлай республикада да гьюрметли адамланы бириси. 

Ол 1946-нчы йылда тувгъан ва оьзюню загьмат ёлун ДГУ-ну битдиргенден сонг «ЧиркейГЭСстрой» деген бирлешивде мастер болуп башлагъан. Асгер борчун кютген сонг, ол мастер-прораб, Къызылюрт шагьарны баш архитектору, Къызылюрт шагьарны партия комитетинде бёлюкню заведующийи болуп ишлей.

1979-нчу йылда 33 йыллыкъ Шамил Магьамматович Россияны къыбла боюнда инг де уллу деп гьисапланагъан «Чирюрт фосфорлу тузлар» деген завод­ну директору болуп салына.

СССР-ни химия промышленностуну министерлигини гьисабындагъы заводда ол 11 йыл ишлей. Ол шо йылланы ичинде зараллы ерде ишлейген ишчилери учун бары да онгайлыкъланы этген. Денгизни ­ягъасында 160 адамгъа ял алмакъ учун профилакторий, парник ва «Шамхал­янгыюрт» деген къуш фабрика булан бирге кёмекчи хозяйство къургъан.

Ондан къайры да, заводну гьисабында шагьаргъа гиреген уллу ёл асфальт, бир нече яшлар бавлар, спортзал ва кёп квартирли уьй де этген.

Сонг Зайнал Магьамматович оьр гьакимлик ерлерде ишлеген. Шолардан айырып айтсакъ, ол тюрлю-тюрлю йылларда Къызылюрт шагьарны башчысы, Да­гъыстанны Оьр Советини Председателини ва «Дагестанглавснаб» деген бирлешивню генеральный директоруну замес­тителлери, Да­гъыстанны промышленностуну ва сатыв-алыв министри, Дагъыстанны Гьукуматыны Председатели, Россияны Федерал Советини жыйынында Дагъыс­танны Халкъ Жы­йыныны вакили, «Единство и Отечество» деген партияны Дагъыстандагъы бёлюгюню председатели, 2014-нчю йылдан тутуп, Дагъыстанны Башчысыны Центральный округдагъы вакили.

Шамил Магьамматовични гьалал загьматы гьукуматны янындан таба къыйматлангъан. Огъар «Россияны ат къазангъан къурувчусу» деген сыйлы ат берилген, шолай да Ш.Зайналов   «Ватанны алдындагъы къуллукълары учун» IV даражалы, «Дослукъ» ва «Гьюрметлев Белги» деген орденлер булан савгъатлангъан.