Себеплерин англатмагъа болмайман, тек “Анжи” шо гюн къаравчуланы да бек къарсалатып, осал ойнады.
Йигирма алтынчы минутда «СКА Энергияны» якълавчуларыны хатасындан пайдаланып, Али Гьажибеков башы булан гол гийирип, оюнну санавун ачды.
Оюнну къыркъынчы минутунда “Анжини” якълавчусу Камил Агъаларов оьзюню штрафноюндан топну тебип чыгъараман деп айланагъанда, топ къангып оьзюню къолуна тийип битгени сонг эс этди. Шондан сонг оюнну судьясы белгилеген пенальтиден топ гийирген сонг Гогуа да «Анжини» къапусуна гол гийирди.
Къаравчулар бизин команда танапусдан сонг сама, экинчи таймны вакътисинде оьзлени оюнун жанландырмагъа болажакъ деп умут эте эдилер. Тек….
Экинчи таймны башында судья Хабаровск футболистлерини къапусуна, бизин Максимовну оьзлени штрафноюнда йыкъгъан деп, он бир метрлик пенальти берди. Топгъа урма Асилдаров чыкъды. Топ къапуну уьстюнден учуп, стадионну “Анжини” къаравчулары олтурагъан боюна барып тюшдю.
Шолайлыкъда, 1:1 санав булан тамамлангъан оюнну барышында эки де команда оьзлени къолайсыз якъдан гёрсетди. Оюнну судьясыны да сынаву аз экени гёрюнюп тура эди. Нечик де, ол оюнну барышында кёп санавда янгылышлар йиберип турду.
Оюн тамамлангъан сонг мухбирлеге береген баянлыгъында къонакъланы баш тренери, Магьачкъаладан бир очко алып гетмек оьзюню командасы учун уллу уьстюнлюк экенин яшырмады. Футбол майданны сан янына ва судья оьзюню ишин юрютген кююне рази тюгюлюн де билдирди.
Ташуев де аслу гьалда оьрде эсгерилген себеплер саялы шо гюн “Анжи” утуп болмады деп гьисап этегени гьакъда айрыча айтды.
Ш. КИШИЕВ.
