Ол 1968-нчи йылда Къарабудагъгент юртда Гьажи Гьажиевни агьлюсюнде тувгъан. Дагъыстан медицина академияны 1993-нчю йылда битдирген сонг, оьзюню загьмат ёлун «Скорая помощь» деген республика станцияда башлагъан. Уьч йылны узагъында Къарабудагъгентдеги «Скорая помощь» деген станцияны бёлюгюню заведующийи болуп да тургъан.
1997-2003-нчю йылларда ол республиканы ич ишлер министерлигини медицина бёлюгюню инспектору, сонггъа таба ДР-ни МВД-сини алгъасавлу кюйде медицина кёмек болдурагъан бёлюгюню начальниги болуп да уьч йыл ишлеген. Буссагьатгъы вакътиде ишлейген къуллугъунда намуслу кюйде чалышагъаны буса алты йыл бола. Гьар гюнлюк шолай жанлы гьаракаты учун 2000-нчи йылда ол « Жамият низамны болдурувда гёрсетген айрыча гьаракаты учун» деген медаль булан савгъатлангъан. Россияны Президентини, РФ-ни МВД — сини атындан огъар баракалла кагъызлары да тапшурулгъан.
– Бизин медицина-санитар бёлюкде бир вакътини ичинде 250 адамны савлугъун къолайлашдырып болар йимик шартлар яратылгъан, – дей бизин булангъы лакъырында Магьамматзагьир Гьажиев. – Бёлюкде ишин яхшы бажарагъан докторлар кёп бар. Оланы арасында пачалыкъны янындан гьюрметли атлагъа лайыкълы болгъан врачлар, илмуланы кандидатлары ва докторлары айрокъда кёп бар. Оланы къасты булан бизин республиканы ич ишлер къурумларыны къуллукъчулары кёплери оьзлени савлугъун беклешдирген.
Бугюнлерде бизин медицина идараны хирургия, неврология, травматология бёлюклери тарыкълы бары да ясандырывлар булан таъмин этилген. Шолайлыкъда, полицияны къуллукъчуларыны савлугъун беклешдирмек учун бары да имканлыкълар яратылгъан. Оланы бирлерин аврувларына къаратмагъа Москва, Санкт-Петербург шагьарлагъа да йиберебиз. Бизин бёлюкде савлугъун багъагъан аврувланы гьайын этип гьар гюн де кёп иш юрюле. Четим болса да, къуллукъчулар оьзлени ишин намуслу кютелер. Шо гьакъда айрыча эсгермеге сюемен, –дей ол дагъы да.
Оьзюне 46 йыл болагъан медицина къуллукъну полковниги къарабудагъгентли Магьамматзагьир Гьажиев МВД-ни медицина-санитар бёлюгюню ёлбашчысыны заместителине ерли гётерилгенин уллу оьрлюк гьисаплайман. Огъар ишинде гележекде дагъы да уьстюнлюклер, яшавунда савлукъ, насип ёрамагъа сюемен.
Измулла ГЬАЖИЕВ.
СУРАТДА:
М-З. Гьажиев.
Автор чыгъаргъан сурат.
