Белгили себеплеге гёре, артдагъы вакътилерде Россиягъа къаршылыкъ билдирген пачалыкълардан гелеген гьар тюрлю маллар уьлкебизни базарларында ва тюкенлеринде кемийгенлиги ачыкъ болуп гёрюне. Шо саялы тышдан гелеген малланы багьалары да бир къадар гётерилегени къоллавчуларыбызны янындан бир тюрлю разисизликлени тувдура.
Озокъда, шону гьисапгъа алып, бугюнлерде савлай Россияда йимик, бизин регионда да айланабыздагъы дос тыш пачалыкълар булан мал айландырывну ёллары ахтарыла. Эсгерилген маъалагъа байлавлу болуп тюнегюн Магьачкъаладагъы Печатны уьюнде далапчылыкъ булан машгъул болагъан тайпалагъа тыш пачалыкълагъа малын йибермеге муштарлыларына кёмеклешеген центрыны башчысы Руслан Абаскъулиев булан прес-конференция оьтгерилди.
– Савлай Россияда йимик, бизин регионда да санкциялар билдирилгени саялы уьлкебизде болдурулагъан промышленный малланы къадары 12 процентге тёбен тюшген, – деди Руслан Тагиевич оьзюню баянында. – Шо даражада бизин региондан тышгъа йиберилеген маллар да кем болма тюше эди. Тюзю, оьтген йыл Дагъыстандан тышгъа январ айда 4 миллион долларгъа маллар йиберилген эди буса, бу йылны январ айында шо санав 7 миллион долларгъа етишген. Демек, гьалиги шартлагъа гёре бизин центр да мал айландырывну ёлларын ахтарыв булан машгъул бола. Индиягъа, Китайгъа, Австралиягъа, гюнтувушдагъы арап пачалыкълагъа ва оьзгелерине Дагъыстанда болдурулгъан маллар йибериле ва шогъар гёре тышдан тарыкълы маллар къоллавчуланы ич талапларына гёре ташыла.
Прес-конференцияны ахырында Руслан Абаскъулиев республикабызны маълумат къуралларыны къуллукъчулары берген кёп къадардагъы соравларына да толу кюйде жаваплар къайтарды.
Шону гьисапгъа алып, эсгерилген агьамиятлы масъалагъа байлавлу болуп газетибизни гележекде чыгъажакъ номерлерини бирисинде айрыча макъала гьазирлемек де гёз алгъа тутулгъан.
Къ. КЪАРАЕВ.
