Дагъыстан Россияны лап да къыбла боюнда ерлешген аграр республика гьисапда белгили. Адатлы кюйде, бизин республикабызда оьсюмлюкчюлюк тармакъ булан янаша гьайванчылыкъ тармакъны оьсдюрювге де артдагъы йылларда айрыча тергев берилегени англашыла.

Озокъда, гьайван-мал этден-бутдан тюшмесин, тас этивлеге ёл берилмесин учун зараллы аврувланы алдын алывгъа байлавлу масъалаланы ёрукълашдырыв агьамиятлы.

Шону гьисапгъа алып, бугюнлерде Магьачкъалада «Центр ветеринарии» деген федерал пачалыкъ бюджет идараны (ФГБУ) башчысыны заместители Сергей Капус-тинни ДР-ни Гьукуматыны Председателини заместители Нариман Абдулмуталимов булан ишчи ёлугъуву оьтгерилди.

Шо ёлугъувда Дагъыстан Республиканы ветеринария комитетини председатели Магьаммат Шапиев де ортакъчылыгъын болдурду ва алгъа салынгъан масъалагъа байлавлу болуп оьз пикруларын аянлашдырды.

Шондан сонг ол гьайванчылыкъ, къушчулукъ, балыкъчылыкъ тармакъларда яйылма имканлы аврувланы алдын алывгъа байлавлу болгъан гьакълашывгъа асасланып, оьз пикруларын республикабызны маълумат къуралларыны къуллукъчуларына да малим этди.

– Дагъыстанны гьайван-мал оьсдюрювде етишген уьстюнлюклери савлай элге белгили, – деди Магьаммат Шагьабутдинович оьзюню баянында. – Дагъысын айтмагъанда, бизин республикабызда сакъланагъан къой малланы умуми санаву 5 миллионлагъа ювукълаша. Айлана якъда билдирилген санкцияланы шартларында ич ва тыш талапланы гьисапгъа алып, къоллавчуланы сан янлы къой эт булан таъмин этивге айрыча тергев берилегени англашыла. Шону учун Сергей Капустин булан бирче бизин республикабызгъа гелген делегацияны ортакъчылары да къошулуп генг кюйде гьакълашыв болду.

Россияны юрт хозяйство министерлигини, «Центр ветеринарии» деген ФГБУ-ну ва ДР-ни ветеринария комитетини арасында болгъан разилешивге гёре, гележекде де зараллы аврувланы алдын алмакъ учун тарыкълы болагъан дарманланы гечикдирмей, оьз заманында асувлу кюйде пайдаландырмагъа тюшегени гьакъда пайдалы таклифлер де арагъа чыкъды.

Шону учун федерал бюджетден айырылагъан акъча маяланы да тёкмей-чачмай тутумлу кюйде къолламагъа тюшегени гьакъда ишчи ёлугъувну ортакъчыларыны арасында айрыча буварыв этилди.

Ишчи ёлугъувну гьасиллери ДР-ни ветеринария комитетинде болгъан жыйында чыгъарылды.