Тюз юрютюп билмей яшав къайыкъны,
Сала бирлер къысматгъа бар айыпны.
* * *
Ярлылыкъ да яра буса баврунгну,
Къыйын бола гётерме гьар аврувну.
* * *
Къатыкъ болуп хапгъан гьарам ашына,
Негьакъ тюшмей таш намартны башына.
* * *
Эгер елге ташлай бусанг сёзюнгню,
Учуп гетме къоймай сакъла оьзюнгню.
* * *
Йылама, къыз, вёре, эрге баргъынча,
Сонг гьынкъ этме заман болур къангъынча.
* * *
Билгенден сонг герти пагьму тюгюлню,
Йыравлагъа гёнгю кюлей бюлбюлню.
* * *
Артып тура низам салма борчлулар,
Тек аз болмай бир де хазна урчулар.
* * *
Дуванчылар сюйсе ишни «эзмеге»,
Къанунланы таби эте оьзлеге.
* * *
Гьар ожакъны хожайыны бир бола,
Эки буса–атышагъан тир бола.
* * *
Ашбаз ортакъ аш къазандан ашамай,
Ашаса да, онча узакъ яшамай.
* * *
Ол уьйренген домбурда къой сыдырып,
Энни юрюй адамланы къыдырып.
* * *
Гьакъылына гёре яшай гьар хурт да,
Бири–хавда, бири буса–гьармутда.
* * *
Къатын эте эрни болат къашлы да
Яда этме бола «мююзбашлы» да.
* * *
Таза болсун учун уьйню гьавасы,
Къырда къалма герек сёзню къавгъасы.
* * *
Башчысыз халкъ чыгъа буса гюп болуп,
Башын ийип уьйге къайта тюп болуп.
* * *
Сюйсенг, янгы бай, гюргюрдей гёпюр сен,
Тек герексен оьтме сират кёпюрден.
* * *
Биз шайтангъа къуллукъ этип тургъанбыз,
Оьзюбюзге гёре яшав къургъанбыз.
* * *
Оьктем бол сен, хоншум, къылый къатындан,
Сёйлейгенни гёре сени артынгдан.
* * *
Ким ялгъанны чача буса урлукъдай,
Чыкъгъанмыкен деп тергеме унутмай.
* * *
Гьакъ юрекден къылагъанлар намазын,
Эпсиз аста чыгъаралар авазын.
* * *
Къарамасанг тюнегюнге бурулуп,
Сюрюнерсен тангаланга урунуп.
* * *
Гелген къатын Къумукътюзде яш таба,
Бизден къайры ким де мунда баш таба.
* * *
Сюйсенг барып къара Ерге Айдан да,
Налог сени излеп табар къайдан да.
* * *
«Маскев шагьар гёзьяшлагъа инанмай»,
Сени къайгъынг–ону дерти саналмай.
* * *
Оьлген кимни сёге бусанг чирелип,
Ол бетинге тюкюрмек бар тирилип.
* * *
Биз къылычны къуйгъан эдик сабангъа,
О тот басды, ошап бизин замангъа.
* * *
Негер тарыкъ хоншума ит сакълама,
Эпсиз къайыр къатыны бар гьаплама.
* * *
Тил булан да бола бичен чалмагъа,
Амма къышда тюше сютсюз къалмагъа.
* * *
Бу эркинлик–эрке оьсген яшдай о,
Тормозлары ёкъ машинге ошай о.
* * *
Къойса Гюнеш ювугъуна бармагъа,
Къабул бирлер огъар да ес болмагъа.
* * *
Бугюн кимни назик бойну моюса,
Байлар къарап тура салма боюнса.
* * *
Сёгюш сёзлер оьзлеге ёл табажакъ,
Тиш арадан сыпкъырылып чабажакъ.
* * *
Юртну башы тюгюл буса абурда,
Къагьарлана ятгъанлар да къабурда.
* * *
Тал терекни болмайгъандай емиши,
Талайсыздыр авлети ёкъ гьар гиши.
* * *
Къумукъман деп макътангъандан не пайда,
Халкъынг учун этген ишинг, айт, къайда?
* * *
Сююндюрме сюе бусанг къатынны,
Аривю гьеч, авурун ал алтынны.
* * *
Гёрме сюймей бусанг ишни бетерин,
Башлагъынча ойлаш нечик битерин.
* * *
Гюнеш биле кимге нечик тарыкъны,
Туснакъ уьйге бермей бир де ярыкъны.
* * *
Оьзюнг булан сюйсенг пилни алып чыкъ,
Амма «гюмрюк гьакъны» къолгъа салып чыкъ.
* * *
Хуртгъа:–Ёлунг къайсылай?–деп сорагъан.
–Воллагь,–деген,–балыкъ тутма бараман.
* * *
Бай адамда болмай ягьны югъу да,
Гечелерде къача ондан юху да.
* * *
Сайлавларда ол яв болуп ягъылды,
Сонг гьар кимге тюбек болуп чагъылды.
* * *
Аякъ ичдим инче белинг саялы,
Сонг ичкичи болдум тилинг саялы.
* * *
Акъча борчлар – яшлар тюгюл къычырма,
Тек юхунгну бола гече къачырма.
* * *
Айтыв недир болмагъан сонг гьазы да,
Аччысы да, татлиси де, тузу да.
* * *
Бу яшавну ондан къайры къарты ёкъ,
Мемуарлар яза, яза...–арты ёкъ.
* * *
Сексенде де сенден сююв къачмажакъ,
Амма юрек къайтып чечек ачмажакъ.
* * *
Чиновникни алапасы–манатлы,
Хансарайы буса – алты къабатлы.
* * *
Эгер къанлы бусанг, эки къабур къаз,
Бир–олай да ва булай да болур аз.
* * *
Чангда ята китапланы хыйлысы,
Сберкнижка–огъар лап да сыйлысы.
* * *
Бирлер учун акъча татли емишдей,
О нечакъы бар буса да етишмей.