Къызылюрт районну Шушановка деген юрту Стальское деген сельсоветге гире. Алда Гёктёбе деп айтылагъан юрт 1899-нчу йылда къурулгъан.

 Шону да Россия империяны губерниясындан гелген Шушанов деген ер есиден ер де алып, 98 орус агьлю къургъан. Артда шо кютюрге орусну атын да къойгъанлар. Бугюнлерде шо юртда 2000-ден къолай адам яшай, шоланы да 75 проценти – къумукълар.

Гьали-гьалилерде Шушановканы орта школасыны охувчусу Къурбан Бамматов хафиз деген атны алгъан. Шолай демек Къуранны гёнгюнден билмек бола. Шо пагьмулу улан Буйнакск районну Халимбекавул юртунда Абдулла Абушев башчылыкъ этеген хафизлени школасында охуй. Къуранны ол 7 айдан уьйренген.

Биз Къурбанны гьакъ юрекден къутлай туруп, дагъы да уллу оьрлюклеге етишмекни ёрайбыз.

Уланны атасы Юсуп Бамматов Шушановка юртну имамы болуп кёп йыллар ишлеген ва авлетлерине ислам билимлени уьйретген.