Бираз алда Къарабудагъгент районну билим берив управлениесини актовый залында районну охув ожакъларында къумукъ тил дарсланы юрютювде тувулунагъан масъалалагъа багъышлангъан семинар оьтгерилди. Шо семинарда ДГУ-ну дарс беривчюсю, Дагъыстан адабият кафедраны доценти Агъарагьим Солтанмуратов, жамият чалышывчу Гьабибулла Алхангьажиев, «Бизин тил» деген журналны баш редактору Рашит Гьарунов, районну школаларыны къумукъ тилден ва адабиятдан дарс беривчюлери ортакъчылыкъ этдилер.
____________________________________________________________________
Агъарагьим Солтанмуратов семинарны ача туруп, ана тиллеге байлавлу масъалаланы эркин кюйде ахтармакъ учун маълумат байлавлукъ технологияланы къолламакъны маънасы ва агьамияты барны айтды.
–Ишиме байлавлу мен республиканы билим берив ожакъларына барагъан кююм бола,–деди А. Солтанмуратов. –Къайда барсам да, муаллимлер къумукъ тилден ва адабиятдан дарслар юрютмек учун охутув китаплар, пособиелер, иш программалар етишмей деп кант эте болалар. Шо муратда жамият къурум «Бизин тил» деген журналны чыгъарма башлагъан. Бу журналда школаларда къумукъ тилден, адабиятдан тийишли даражада дарсларда къоллама болагъан кюйде макъалалар, материаллар берилежек,–деди ол.
–Бизин журналда ана тилден ва адабиятдан дарс береген муаллимлени материаллары чыгъарылажакъ. Шону учун сиз дарсларда къоллайгъан программаларыгъызны гьакъында хабарлагъаныгъызны сюер эдим, – деди Рашит Гьарунов.
Семинарны вакътисинде муаллимлер журналгъа байлавлу оьзлени ойларын айтдылар ва соравлар бердилер. Ону ахырында Къарабудагъгент районну билим берив управлениесини начальниги Асадулла Гьажиев жыйынны ортакъчыларына ана тиллени оьсдюрмек ва сакъламакъ учун этилеген гёрмекли ва пайдалы гьаракатына баракалла билдирди.
Бизин мухбирибиз.
