Артдагъы заманларда коронавирусну хабары сейир болуп, авруйгъанланы да санаву кемип тура демеге ярай. Респуб­ликаны югъагъан ав­рувланы ва СПИД-ни центрыны баш врачы Равгьаният Мирзаева соравубузгъа жавап бере туруп, коронавирусгъа байлавлу оюн айтды.

 Ол белгилеген кюйде, жуманы узагъында жамиятны арасында коронавирусгъа тест берегенлени санаву оьр даражада буса да, Республиканы югъагъан­ аврувланы центрында, Республика диагностика центрда да гьалиге анализлери положительный болуп чыкъгъанлар ёлукъмагъан.

– Бир жуманы ичинде коронавирусну тергетмек учун антителалагъа анализ бергенлени арасында гьалиге положительный тест булан гьисапгъа алынгъанлар ёкъ, – деп билдирди Равгьаният Мирзаева,–шо –республикадагъы гьал ёрукълашгъанны гёрсетеген мисал. Амма дагъыстанлы врачлар да ортакъчылыкъ этген Москвада оьтгерилген инфекционистлени форумунда экспертлени билдиривлерине гёре май айда COVID-19-ну къошулчан тайпасы штам омикрон булан бирлешип, коронавирусну гезикли 6-нчы тирети болажакъ ва яйылажакъ деп къаравуллана, – деди ол. Баш врач эсгерген кюйде, бугюнлеге ерли янгыз вакцина коронавирусну алдын алмагъа бола.

– Биз Москвадан савлай рес­пуб­ликагъа вакцина гелтиребиз. Сонг шону оьзюбюзню холодильниклерибизде сакълайбыз, – деп узатды сёзюн Р. Мирзаева. – Артда шону 2-3 гюнню ичинде респуб­ликаны гьар ерлерине бакъдырабыз.

Бир жума алда биз 105 минг доза вакцина алдыкъ. Шоланы вакцина етишмейген ерлеге алып бардыкъ. Аслу гьалда Магьачкъаладагъы поликлиникалагъа ва республиканы оьзге шагьарларындагъы медицина ида­ралагъа йибердик, – деди баш врач.

 

П. ГЬАЙБУЛЛАЕВА.

СУРАТДА: Равгьаният МИРЗАЕВА.