Тёбен Къазанышдан чыкъгъан белгили адамланы арасында пача армияны полковниклери деген чин 12 адамгъа берилген болгъан: Абдулкъадир Дайитбеков, Сурхай Сафаралиев, Алибек Алибеков ва башгъалары. Совет Армияны полковниклери: Гьажи Садрутдинов, Ильяс Абдуллаев, Ильяс Къазиханов, Абдулла Магьаррамов, Салис Акаев, Абдулла Абдуллаев, Юсуп Халитов, Джами Татамов ва оьзгелери.

Милицияны полковниклери: Шагьбан Бекмурзаев, Али Абуталибов, Гьажи Зайирбеков, Мурат Солтанов, Акай Исаев. Аселдер Аселдеров – КГБ-ни полковниги, Абакар Дагьиров – ФСБ-ни полковниги. Магьаммат Шихов 1926–1933-нчю йылларда, Совет пачалыкъны токъташдырывну инг де къыйынлы йылларында милицияны Буйнакск шагьар ва район бёлюгюню начальниги болуп ишлеген.

Прокуратура ва судланы къуллукъчуларындан: Тажутдин Бижамов – юридический илмуланы доктору, юстицияны генералы, Къаягент районну прокурору, Дагъыстан Республиканы юстиция министри болуп ишлеген; Завур Исаев – юстицияны полковниги, Бабаюрт районну ва Буйнакск районну прокурору, Дагъыстан Республиканы генеральный прокуроруну заместители; Албёри Албёриев – Буйнакск район­ну прокурору, Шарабутдин Ражбудинов – Къаягент районну ва Буйнакск районну баш судьясы, Гьажихан Гьажиханов Буйнакск районну баш судьясы болуп ишлеген. Магьаммат Ханмурзаев Къарабудагъгент районда ярашывлукъ судья болуп кёп йыллар ишледи. Аселдер Аселдеров – Буйнакск районда ярашывлукъ судья.

Дагъыстан Республиканы оьр гьа­кимият къурумларында ишлеген къазанышлылар: Адилгерей Дайитбеков – 1930-1937-нчи йылларда Дагъыстанны ёл къурулуш управлениесини начальниги, Агьмат Солтанагьматов – Дагъыс­тан профсоюзланы председатели, Даг­­консервтрестни уп­равляющийи, Дайит Дайитов – Дагобл­совпрофну пред­­седатели, Месей Алхасова – Да­гъыс­тан ашамлыкъ промышленностну министри, Макашарип Аселдеров – Дагъыстанны билим берив министерлигинде ишлеген, педагогика илмуланы кандидаты. Юртдагъы 3 номерли орта школагъа ону аты къоюлгъан. Закарья Магьамматов – Дагестангеологоразведка управлениесини начальниги, Шамсутдин Аселдеров ЖКХ министерлигини министрини заместители, Камалутдин Камалутдинов район администрацияны башчысы болуп хыйлы йыллар ишледи, Дагъыстан Республиканы Президентини Администрациясында ишледи, ДР-ни юрт хозяйст­во ва сурсат министрини заместители болуп чалышды.

Гьамит Бучаев – Дагпотребсоюзну председатели , Даггосснабны управляющийи болуп ишлеген. Бугюнлерде Гьамит Агьматович Бучаев Магьачкъала шагьардагъы оьзю къургъан халкъ хозяйство университетни президенти, экономика илмуланы доктору, академик. Шо университетни ректору – уланы Агьмат Бучаев, экономика илмуланы доктору. Ону уланлары Агьмат, Ягьия , къызы Зайнап атасыны ёлун тутуп, илму-гьакимият тармакъда чалышалар. Бучаев Камил – медицина илмуланы кандидаты, Бучаев Ньютон ( Забит ) – физика-математика илмуланы кандидаты. Олагъа Къазанышда алимлени династиясы деп айтса да ярай. Юртну бир орамына Бучаевлени орамы деп ат къоюлгъан.

Гьар тюрлю илмуланы доктору деген даражасына ес болгъан къазанышлыланы арасында шулай адамланы атларын эсгермеге тюше : Залибек Залибеков, Элмира Дайитбекова, Къазигерей Ханмурзаев, Камил Ханмурзаев, Паша Абдурагьимов, Зайнутдин Аселдеров, Магьаррам Магьаррамов, Шагьабутдин Расулов, Жалалутдин Агьматов, Темирболат Алибеков, Жангиши Хангишиев, Хизири Гьамзатов. Алимлик ёлда илмуланы кандидаты деген атгъа ес болгъанлары 50-ден де артыкъ бардыр.

Шаир, драматург, композитор Темирболат Бийболатовну талигьи де чатыраш гелип, ол да сюргюнлеге сюрюнюп, яшавуну артын онглу къайдада тамамлама болмагъан. Ол Дагъыс­тан бийив ансамблин къургъан, Къумукъ театрны къургъанлардан да ол бириси болгъан.

Магьаммат Хангишиев – къумукъ «букварны» оьз вариантын тизген, язывчу ва муаллим. Наби Ханмурзаев – шаир, муаллим, сатиралы шиъруланы устасы, Басир Атаев – шаир, муаллим, Ибрагьим Ханмав Бамматулли – язывчу, педагогика илмуланы кандидаты, Абдулмежит Межитов –шаир , муаллим, Абдулгьамит Татамов –шаир.

Шамил Ханмурзаев Дагъыстан Гос­телерадиону дирижёру эди. Белгили йыравлар, Дагъыстанны халкъ артистлери Магьамматзапир Багьавутдинов, Бурлият Элмурзаева да – къазанышлылар. Дагъыстанны халкъ артисти Шарабутдин Манташев хыйлы йыллар Къумукъ театрны директору болуп ишлеген, Ушгъуят Сафаралиева – Дагъыс­танны халкъ артисткасы. Магьаммат Къурбанов кёп йыллар Къумукъ театрны артисти болуп ишлеген, «Молла Насрутдин» деген спектаклни язгъан.

Медицина тармакъдан Шамсутдин Закарьяев, Айнутдин Минатуллаев, Камил Гьашимов – Къазанышда биринчилей врач касбуну юрютген адамлар. Ш. Закарьяев кёп йыллар участка больницаны баш врачы болуп ишлеген. А. Минатуллаев дагъы да кёп йыллар шо больницада хирургия бёлюкню заведующийи болуп чалышгъан. Абдулла Албёриев – район поликлиниканы баш врачы болду. Татам Татаев шо поликлиника къурулгъанлы, ону баш врачыны заместители болуп да, баш врач болуп да ишледи. Гьажимурат Ражбудинов – район администрацияны башчысыны савлукъ сакълав тармакъгъа къарайгъан заместители. Олар барысы да – Дагъыстанны ат къазангъан врачлары.

«Дагъыстанны ат къазангъан учители» деген ат берилген къазанышлылар да кёп. Оланы арасында Ягьия Магьамматов, Гьашим Гьашимов, Жамалутдин Ханмурзаев, Алыпкъач Алыпкъачев, Магьамматрасул Бучаев, Татам Аселдеров, Марипат Межитова, Дина Алиева, Софья Садрутдинова, Мадинат Магьамматова, Агьмат Солтанбеков юртда аты айтылгъан, касбусуна гьакъ юрекден берилген муаллимлер гьисапда танывлу. Рабият Алкъылычева – РФ-ни ат къазангъан учители.

Спорт яшавундан къазанышлы 50-ге ювукъ адам гьар тюрлю респуб­лика, Россия, дюнья ярышларында гёрмекли ерлеге етишген. Оланы арасында Бозигит Атаев ушу-саньда ябушувдан Дагъыс­танны 9 керен, Россияны 8 керен, Европаны 3 керен ва дюньяны 4 керен чемпиону болгъан. Бахтияр Агьматов Олимпия оюнланы гюмюш медалын къазангъан. Арадан кёп заман гетип огъар чемпион ат да берилди. Бозигит Закарьяев тхеквандодан Европаны чемпиону, Расул Муртазалиев – тай боксдан Европаны чемпионатында экинчи ер алгъан, Россияны ат къазангъан тренери. Олар кёп, барысыны да атларын эсгермеге бажарылмай. Савлай дюньягъа аты айтылгъан кочап Сали Сулейман (Мама Мегьтуллаев) гиччилей де, уллу болгъанда да Къазанышда кёп йыллар яшагъан.

Тёбен Къазаныш, гертиден де, оьзю­ню оьзтёречелигин сакълагъан, табиатны бир гёзел ва ниъматлы еринде токътагъан инг уллу къумукъ юртланы бириси.