– Террор ишлер токъталмай. Артдагъы 20 йылланы ичинде олар кемимеген. Шону себебин де жинаятчылар, террорчулар тийишли даражада такъсырланмайгъандан, законлар мекенли кюйде яшавгъа чыкъмайгъандан гёребиз.


– 15-нчи декабр – Касбусун кютювде жанын къурбан этген журналистлени эсделик гюнюне багъышлангъан не чаралар гёрме хыялыгъыз бар?


– Декабр айны 14-нде онда журналистлени ихтиярларын якълайгъан федерация Москвада «дёгерек столну» айланасында пик­ру алышдырыв оьтгере. Россияны Журналистлерини союзуну секретарларыны бири гьисапда мен онда ортакъчылыкъ этмесем болмай, чыгъып сёйлеме де тюшежек. Декабрни 15-нде Россияны Журналистлерини союзу оьзюню жыйынын оьтгере. Онда да ортакъчылыкъ этежекмен.

– Дагъыстанда шо агьвалатгъа байлавлу чара болажакъмы?

– Шо агьвалатдан сонг бир жумалар гетип, республикада да, Москвада йимик чаралар оьтгерме хыялыбыз бар. Шо чаралагъа бары да маълумат къуралланы къурумларыны вакиллери чакъырылажакъ. Оьлтюрюлген журналистлени агьлюлери де чакъырылажакъ. Олагъа материал якъдан кёмек этме де сюебиз.

– Али Агьматович, касбу борчларын кютеген журналистлеге бакъдырылгъан террорчулукъ Дагъыстанда кёп бола деп айтыла. Шо гертими?

– Муна хас кюйде билдирилгени йимик, арт вакътилерде террорчуланы къолундан Россияда 340 журналистни жаны къыйылгъан. Бизде, Дагъыстанда, террорчуланы къолундан 17 журналист къурбан болгъан. Дагъыстанда оьлтюрюлген журналистлени санаву Россиядагъы умуми санавну 4 проценти болуп токътай.

– Журналистлеге чапгъын этген жинаятчылар тутулгъанмы?

– Гьажи Абашиловну оьлтюрген деп шек­лик тувдурагъан беш адам, Агьмадилавгъа чапгъын этгенлер тутулгъан, тек олагъа гьали де суд болмагъан. Гь. Камаловну оьлтюрген деп гьисапланагъан 3 адам къачып айлана. Оланы тутмакъ учун халкъара излев билдирилген.


– Дагъыстанда оьлтюрюлген журналистлеге эсделик салмакъ гёз алгъа тутулгъан. Журналистлени уьюню алдында таш да салынгъан. Гёз алгъа тутулгъан эсделик не заман гьазир болажакъ?

– Жаны къыйылгъан дагъыстан журналистлеге салынажакъ эсделик бронзадан болажакъ. Инг яхшы эсделикге конкурс билдирилген. Муна уьч проект Дагъыстанны Журналистлерини союзуна гелме де гелген. Болжалы етгенде олагъа къаралажакъ ва сайламлысын айыражакъбыз.

– Лакъырыбызны ахырында, бизде айтылагъан кюйде, хатаргъа берекет бермесин деме сюебиз.