Айтагъаным, юртлу далапчыланы сиптечилиги ва «Бабаюрт район» деген муниципал къурулувуну башы Элдар Къарагишиевни кёмеклиги де булан юртда айры спортзалны къурулушу башлангъан. Умуми оьлчевю 500 квадрат метрден де артыкъ комплексде яшлар учун бары да онгайлыкълар болдурулажакъ. Залда киринеген ва чечинеген ерлер, намаз уьй болажакъ.
– Яшырмагъа негер тарыкъ, бугюнге ерли Хамаматюртда яшлагъа спорт булан машгъул болсун учун герекли тергев этмеге болмадыкъ, – дей Хамаматюртну юрт башы Нажмудин Хурунов. – Гьалны Бабаюрт районну башы Элдар Къарагишиев де англагъан сонг, ол оьзюню янындан болагъан кёмегин этежекни билдирди. Ишге юртлу далапчылар да къуршалды. Гьар адам оьзюню къолундан гелеген кёмекни этмеге алгъасай.
Спорт халкъны бирикдирегени Хамаматюртда юрюлюп турагъан ишлер де гертилей. Спортзалны къурулушунда савлай юртну халкъы ортакъчылыкъ эте деп де айтмагъа ярай. Акъча булан кёмек этип болагъанлар акъча булан, оьзгелери техникасын берип, къол гюч булан кёмек этегенлер буса, къурулушгъа къуршалып, бугюнге спортзалны кюрчюсю салынып да битген.
Ери гелгенде айтсакъ, районну ва юртну ёлбашчылары спортзалны къурулушуна этип турагъан кёмегин де эсгермеге тюше. Мисал учун айтгъанда, «Бабаюрт район» деген муниципал къурулувуну башы Элдар Къарашигиев ва ону биринчи орунбасары Даниял Исламов залны тамларын тургъузмакъ ва къалкъысын япмакъ учун тарыкъ материалланы толу кюйде берген. Хамаматюртну юртбашы Нажмудин Хурунов буса шо ишлеге 200 минг манат гёрсетген.
Спортзалны къурувну сиптечиси болгъан хамаматюртлу Агьмат Идрисовну сёзлерине гёре, къурулушгъа юртлу далапчыланы да хыйлы кёмеги тийип тура. Юртлу улан Явмудин Хизриев оьз янындан 200 минг манат харжлап, зал учун топуракъны да сатып алгъан ва залны проектини кагъызларын да онгаргъан.
– Явмудин Хизриевни чомартлыгъын юртлулар кёп сююп къабул этдилер ва оьзгелер де жамият ишге актив кюйде къошулдулар, – дей мени булангъы лакъырында А.Идрисов. – Гьар ким оьзю болагъан кёмегин эте. Ери гелгенде, мен олагъа савлай юртлуларымны атындан баракалла билдирмеге сюемен.
Халкъ бириксе, эл тувар дегенлей, къурулуш уллу оьлчевде юрюле. Шогъар хамаматюртлулар оьзлени бары да гючюн бакъдыргъанлар. Кюрчюге салынгъан гьар таш, гьар керпич юртлу яшлагъа инамлыкъ ва гележекге умут бере. Халкъ къурулушуна айлангъан спортзалны ичинден гележекде республика ва Россия оьлчевде уьстюнлюклеге етишежек спортсменлер чыгъажакъгъа хамаматюртлулар теренден инаналар.
Г. ГЬАЖИЕВ,
бизин мухбирибиз.
