Буйнакск райондагъы «Данко» деген яшланы ял алыв лагеринде ябушувну каратэ-киокусинкай деген журасындан Дагъыстанны парламентини спикери Х. Шихсайитовну савгъатларын къазанмакъ учун мердешли  4-нчю ачыкъ ярыш оьтгерилди.

 

Чагъы етти йылдан оьрдеги юзден де къолай яш кочап 21 тюрлю авурлукъларда алтын медаллагъа ес болмакъ учун ортагъа чыгъып гюч сынадылар. Алдынлыкъ алмакъ учун ярышгъа къошулгъанланы арасында, Дагъыстанны шагьарларындан ва районларындан гелгенлерден къайры да, Аштархан шагьардан ва областдан гелген вакиллер де бар эди.

Олимпия оюнланы уьч керен чемпиону, гьалиги заманны макътавлу кочабы Б. Сайтиев мунда гелгени ярышны къыйматын оьрге гётерди. Кёп санавдагъы яш кочаплар ону булан эсделикге суратлар чыгъардылар.

Къыставуллу кюйде юрюлген тутушувланы натижасында гезикли турнирде биринчи ерге Аштархан областны яш каратистлери ес болдулар.

Каратистлени савгъатлав чараларда Буйнакск районну администрациясыны башчысыны заместители Н. Гьажибатыров, районну физкультура ва спорт ишлеге къарайгъан управлениесини начальниги М. Расулов ва башгъа ёлдашлар ортакъчылыкъ этдилер. Турнирде уьст гелген командалар ва спортсменлер, медаллардан къайры да, дипломлар, кубоклар ва багьалы савгъатлар булан да шабагьатланды.

 

 

А. ЗАЛИМХАНОВ.

Суратда: ярышны ортакъчылары.