Грек-рим ябушувдан 16-17 йыллыкъ яшланы арасында Ростов шагьарда оьтгерилген Россияны чемпионатында кахулайлы Арслан Зубайыров 58 кило авурлукъда биринчи ерни къазангъан. Россияны 67 регионундан гелип, 420 кочап ортакъчылыкъ этген ярышларда Арслан алты керен ябушгъан ва барын да утгъан.
Финалда кахулайлы башкир кочап Азат Садыкъовну утуп, алтын медальгъа ес болгъан.
Арслан Зубайыров Калининград шагьардагъы Олимпия резерви деген училищеде охуйгъанлы уьчюнчю йыл. Онда ол тренировкалагъа да юрюй.
Ол 2013-нчю йылда башлап Темиркъазыкъ-Гюнбатыш федерал округну, Россияны, сонг Сербияда оьтгерилген Европаны чемпиону болуп къайтгъаны эсибизде.
Бугюн Арслан Зубайыров оьзюню чагъында инг де гючлю кочаплардан санала ва Россияны жыйым командасына гире. Гьали ол Болгарияда оьтгерилежек Европаны чемпионатына гьазирлик гёрюп башлагъан.
– Европаны ярышларында утгъанлар Китайда оьтгерилежек оьрюм яшланы Олимпия оюнларына баражакъ. Болгарияда, нечакъы къыйын болса да, уьст гелме бек къаст этежекмен. Мени аслу мурадым – Олимпия оюнлагъа бармакъ, – деди ол телефондан таба.
Кахулайлыны гезикли уьстюнлюгю булан биз де къутлайбыз.
Суратда: А. Зубайыров.
