Ол къайтгъан сонг, ону булан ёлугъуп, баянлыкъ алдым.
– Сени уллу уьстюнлюгюнг булан къутлайбыз. Ярышларда сагъа ким булан ябушма тюшдю?
– Савболугъуз. Башлап америкалы, сонг ерли италиялы ва финалда француз кочап булан ёлукъдум. Финалда мен французну биринчи раундда нокаут булан утма болдум.
– Низамсыз ябушувда нече минут ябушасыз?
– Уьч раундда уьчер минут ябушабыз.
– Финалда къыйын болдуму?
– Раундну башындан тутуп, огъар пай бермей, мен чалт, къаст этип ябушдум. Айтагъаным, Италиягъа баргъанча тренерим Зайналбек Зайналбеков булан тренировкаларда яхшы ишлеме тюшдю. Неге тюгюл де, дюньяны чемпионатында белгили спортсменлер булан ябушма тынч болмажакъны алданокъ биле эдик.
Ярышларда гьюрметли къонакъланы арасында дюньяда айтылгъан чемпион Ден Северен де бар эди. Огъар «легенда» деп де айталар. Мен ону булан бирче сурат чыгъартдым.
Магъа Италиягъа барма кёмек этген юртлум Абакар Абуковгъа ва башгъа ёлдашлагъа разилигимни билдиремен.
Суратда: А. Черкесов айтылгъан
Ден Северен булан.
