Июн айны еттисинде Дагъыстанны Гьукуматыны Председатели Абдулмуслим Абдулмуслимов республиканы илму къурумларыны вакиллери булан жыйын оьтгерген. Аслу мурат – Дагъыстанда иш гёреген беш де илму къурумгъа ахтарыв ишлеринде харж яндан да, тийишли болагъан янгы техника алатлар булан да кёмек этмек.
Жыйынны барышында билим беривню ва илмуну министри Ягьия Бучаев айтгъан кюйде, 2022-нчи йылгъа гьар тюрлю илмуахтарыв ишлени юрютмек учун республикадагъы илму къурумлагъа 35 миллион манат гёрсетилген. Министр гьисап этеген кюйде, шо акъча бир илму фондда сакъланма герек.
Илму къурумланы алдында токътагъан масъалаланы гьакъында айта туруп, РФ-ни илмулар академиясыны Дагъыстандагъы илмуахтарыв центрыны ёлбашчысы Акъай Муртазалиев федерал оьлчевде оьтгерилеген конкурсларда тувулунагъан четимликлени эсгерген.
ДР-ни федерал аграр илму центрыны директоруну борчларын кютеген Нариман Ниматуллаев алимлеге илму ахтарывунда грант якълав етишмейгенликни эсгерген.
– Бизин институт емишлени 40 тюрлю жураларын чыгъаргъан. Тек харж булан байлавлу четимликлер тувулуна, грант акъчалар алма бажарылмай. Топурагъыбыз бар буса да, урлукълар болдурмагъа имканлыкъларыбыз ёкъ. Бу йыл аз буса да харж гёрсетилген, тек шо толу кюйде гёз алгъа тутулгъан ишлени кютме етишмежек, – деген Н. Ниматуллаев.
Кемчиликлени гьакъында айта туруп алимлер етишген уьстюнлюклерин де эсгерген. Дагъыстан федерал аграр илму центрыны ёлбашчысы Зайирбек Асадуллаев айтгъан кюйде, оьтген йыл олар картопну 5 тюрлюсюн гелтирип, Гунибни топуракъларында чачгъан. Ол тийишли даражада оьсген ва тыш пачалыкълардан гелтирилеген картопдан къалышмажакъны айтгъан.
Ёлугъувну вакътисинде яш алимлени гьар не якъдан да якъламакъны, экология масъалалагъа байлавлу сув байлыкъларыбызны таза сакъламакъны, ана тиллени якълавну ва оьсдюрювню масъалалары да арагъа чыкъгъан, гьарисине байлавлу таклифлер этилген. Ондан къайры да, илму фондну оьлчевюн 2023-нчю йылгъа 140 миллион манатгъа етишдирмекни, билим беривню ва илмуну министерлигине тапшурулгъан.
Я. БИЙДУЛЛАЕВ.
СУРАТДА: жыйынны вакътиси.
Автор чыгъаргъан сурат.
