Газетни къонакъларын къуллукъчуларыбыз хош-беш булан къаршылагъан сонг олар бизин ишибиз булан таныш болмагъа, гьар гюн токътамай иш юрюлеген газетни сагьифаларын онгарагъан компьютер цехден башлады. Макъалалар охулуп тергелген сонг хаталаны, янгылышланы компьютерден тюзлеп онгара­гъан, гьазир макъалаланы сагьифалагъа ерлешдиреген эсгерилген цехни къуллукъчулары оьзлени ишини гьакъында охувчулагъа тындырыкълы кюйде англатдылар.

«Ёлдаш» газетни маълумат ва политика бёлюгюню къуллукъчусу Абдулманап Гьамзаев, маданият бёлюкню редактору Яраш Бийдуллаев оьзлени бёлюклерини темаларыны айланасында яшлагъа маълумат берди.

Къонакълар, гьар бёлюкню къуллукъчусуну иши булан таныш бола туруп, баш корректор Хадижат Жанболатованы иш еринде де токътадылар. Ол оьзю юрютеген ишини гьакъында хабарлады:

– Мени ишим, бёлюклерден гелген макъалаланы сагьифагъа ерлешдирген сонг, тындырыкълы кюйде охуп, янгылышлар гетмесни къастын этмек булан байлавлу. Газетни сагьифаларында хаталар чыкъмасны къастын этебиз. Мен сагьифада хаталаны тюзлеген сонг да, компьютерде де олтуруп, бары да тюзленгенми деп де тергеймен. Оьзюм газетде юрютеген «Ажайып дюнья» деген сагьифа да бар. Шонда охувчуланы тергевюн тартагъан маълуматлар, къужурлу агьвалатланы ерлешдиремен. Сиз гьали школада охуйсуз. Балики, бирлеригизни язмагъа пагьмугъуз бардыр. Яза турсагъыз, уьйренип де къаларсыз. Къаст этме ва хыялларыгъызны яшавгъа чыгъарма  къоркъмагъыз.

«Ёлдаш» газетни баш редакторуну заместители Абдулкъапур Салимурзаев охувчулагъа газетни бёлюклерини, ишини гьакъында булай деди:

– Гьар йыл сайын бизин яшав алышынагъаны йимик, бизин газетни ишинде де алышынывлар бола. Тармакълагъа гёре экономика, маданият, маълумат бёлюклер республикабызны яшавун суратлама, белгили адамларын арагъа чыгъармагъа, масъалаларын гётермеге къаст этиле. Газетни гьар номерине бизде токъташдырылгъан оьлчевде 130–150 бет маълумат ерлешдириле. Шо саялы бизин къуллукъчуларыбыз, журналистлер ишде ишлейгенден къайры, уьйде де газетни ишини гьайында бола десе де ярай. Тышдан язагъан авторланы ма­къалаларын да бизин къуллукъчуларыбыз, охуп, тюзлеп, газетни талапларына къыйышывлу этип онгара.

Газетни гьар гюнлюк ишини гьа­къында айтгъанда, къыставуллу гезик­лери де бола. Геч гелген алгъасавлу маълуматланы, ерлешдирилгенлерин тайдырып, алышдырмагъа герек гезик­лер болуп да къала. Тек, шогъар да къарамайлы, гьалиги янгы технологияланы кёмек­лиги булан газетни чыгъарыв ишлер хыйлы тынч болгъан.

Сизин арагъызда язагъан яшлар бар буса, къоркъмай, тартынмай, оьзюгюзню языв бажарывлугъугъузну сынап къарамагъа боласыз. Муаллимлеригиз де сизге къол ялгъар,  газетни гьар номеринде чыгъарылагъан «Яшланы дюньясы» деген сагьифада ортакъчылыкъ этмеге яшлагъа имканлыкълар бар.

Газетге сапарыны гьакъында айта туруп, Гьели орта школаны ана тилден ва адабиятдан дарсланы юрютеген Рагьманият Ягьияева о гюн олар мунда гелгенче ТОКС-ну ортакъчылары гьисапда Къарабудагъгент район оьлчевде оьтгерилеген  ёлугъувунда ортакъчылыкъ этгенни, яш ахтарывчулар иш гёрегенни эсгерди. Гьели школаны охувчулары Гьели школаны ТОКС къурумуну  ёлбашчысы Хосар Хосаров булан ахтарывчу ишлени де юрюте.

Гьели орта школада «Яш къаламлар» деген адабият кружок да бар. Ону ортакъчылары Гьажикъыз Дёгеева, Аминат Агъаева, Патимат Келеметова, Ислам Хосаров, Узлипат Зайнутдинова, Гюлженнет Акъаева, Марьям Хизриева, ­Марьям Абзагьирова шиърулар яза­гъанны эсгерди.

Оьзюбюзню яныбыздан охувчулагъа ва муаллимлеге газет булан аралыкъны беклешдирмекни, язгъан шиъруларын, хабарларын редакциягъа йиберип байлавлукъ юрютмекни таклиф этдик.

Ёлугъув охувчу яшлагъа таъсир этежегине, натижада газетибизни охувчуларыны ва авторларыны сыдыралары артажагъына инанабыз.

 

 

 

 

Патимат Бекеева.

Автор чыгъаргъан сурат.