«Анжини» чапгъынчысы Сердер Сердеров Екатеринбургну «Урал» командасына чыкъмагъа сёйлешивлер юрюте. Якълавчубуз Али Гьажибеков да милли лигада ойнама сюймейгенин яшырмай, премьер лиганы командаларыны бирисинден чакъырыв болса, о командагъа чыкъма муштарлыгъын билдире.

«Анжиде» гетген сезон арендада ойнагъан футболистлер барысы да гетегенге ошай. Епуряну, Ещенко, Агьматов къалып къалма да имканлы.

Мкртчян ва Ангбва бир ерге де гетмей, командада къалмагъа гьазирлигин билдирди.

Янгы баш тренер Сергей Ташуевни алдына бир йылдан премьер лигагъа къайтмакъны масъаласы салынгъан. Оьзю Ташуев чакъыражакъ футболистлерден къайры, «Анжини» экинчи лигадагъы, «Дагдизелни» ва «Анжини» жагьил командасындан футболистлер толтуражакъ. «Ерли, дагъыстанлы футболистлеге аслу агьамият бермек» де – Ташуевни алдына команданы акционери Сулейман Керимов салгъан талапланы бириси.

Команда биринчи жы­йымгъа июн айны башында жыйылажакъ. Биринчи лигада Россияны чемпионаты буса алтынчы июльда башлана.

 

 

Шарабутдин Кишиев.