Тутушуп ябушувдан 15–16 йыллыкъ яшланы арасында белгили пачалыкъ чалышывчу Гьамит Гьамитовну эсделигине багъышлангъан турнир Хасавюртда бешинчи керен оьтгерилди. Ярышларда 400-ден артыкъ яш кочап ортакъчылыкъ этди. Уьч гюнню узагъында 11 тюрлю авурлукъда ерли спорт къалада къызгъын ябушувлар юрюлдю.
Ярышланы ачылывунда шагьар администрацияны башчысы Арслан Арсланов, Дагъыстанны спорт министрини заместители Магьаммат Рабаданов, дюньяны чемпиону Агьмат Атавов ва Гьамит Гьамитовну иниси, белгили кочап Сиражутдин Гьамитов, Дагъыстанны жыйым командасыны баш тренери Пахрутдин Залибеков ортакъчылыкъ этди.
– Бугюн бизин шагьарда белгили пачалыкъ чалышывчу Гьамит Гьамитовну эсделигине багъышлангъан турнир бешинчи керен оьтгериле. Ортакъчылыкъ этеген яш кочаплагъа мен уьстюнлюклер ёрайман, – деди Арслан Арсланов.
Магьачкъала шагьарны яш кочаплары етти биринчи ерни къазандылар. Хасавюртну командасы буса дёрт биринчи ерге ес болдулар. Къаягент районну командасыны кочаплары эки биринчи ерни къазандылар.
– Ярышлар бек къурумлу ва къужурлу оьтгерилди. Магьачкъала шагьарны командасы биринчи ерге ес болду. Гьар авурлукъда алдынлы беш ерни алгъанлар ювукъ арада оьтгерилежек Темиркъазыкъ-Кавказ федерал округну чемпионатында ортакъчылыкъ этежеклер, – деди Пахрутдин Залибеков.
54 кило авурлукъда биринчи ерни Магьачкъаладагъы «Динамо» деген спорт школадан 16 йыллыкъ Магьамматали Сосураев къазанды. Ол финалда Паравул юртлу кочап Давут Ибрагьимовну утду.
Магьамматали спортну устасына кандидат. Бакю ва Сухуми шагьарларда оьтгерилген халкъара турнирлени чемпиону. Дагъыстанны чемпионатларында экинчи ва уьчюнчю ерлени къазангъан. Ол Магьачкъаладагъы 32 номерли орта школаны 11-нчи класыны охувчусу. Ярышлагъа яш кочапны тренер Абузагьир Ягьияев гьазирлеген.
Таргъулу 16 йыллыкъ Гьамзат Исрапилов 120 килода экинчи савгъатгъа ес болду. Шо авурлукъда бабаюртлу Ислам Абуев (тренери Гьажимурат Гьажиев) уьчюнчю ерни къазанды.
Магьачкъалалы Гьабиб Къарачаев (тренери Пахрутдин Залибеков) 58 килода уьчюнчю ерни алды.
– Ярышларда бу гезик 400-ден артыкъ яш кочап ортакъчылыкъ этгени нечакъы да яхшы. Дагъыстанны жыйым командасы Хасавюртда оьтгерилежек бизин округну чемпионатында кёп савгъатлы ерлени къазанар деп умут этебиз, – деди ярышланы баш секретары, халкъара даражалы судья Абшин Абшинов.
Суратда: алдынлыкъны алгъанлар артдагъы сыдырада.
Автор чыгъаргъан сурат.
