Чет тав шартлары булангъы Дагъыстанда федерация, регион ва ерли оьлчевлердеги ёлланы даражасын камиллешдирив – агьамиятлы масъала. Шону учун «Аманлыкъны асил ёллары» деген милли проектде белгиленген борчланы яшавгъа чыгъармакъ муратда юрюлеген гьаракат да оьз натижаларын берегени къоллавчуланы янындан разиликни тувдура.
– Регион экономиканы ва шолай да дагъыстанлыланы яшавлукъ шартларыны оьсювюнде транспорт байлавлукъланы беклешдиреген ёллар гёрмекли ерни тута, – деди ДР-ни транспорт ва ёл хозяйство министри Жамболат Салавов – ДР-ни Башчысы Сергей Меликовну «Кавказ» федерал автомобиль ёлланы управлениесини федерал ёл хозяйство агентствосуну» начальниги Александр Лукашук булан болгъан ёлугъувунда. Шолайлыкъда, ерли, регион, федерация оьлчевюндеги ёллардан таба халкъара автомобиль транспорт булан юрюлеген байлавлукълары да беклеше бара. Артдагъы йылларда Китай, Пакистан, Индия, Иран, Тюркия, Азербайжан ва башгъа-башгъа бизин пачалыкъны дос уьлкелер булан мал айландырыв ва шолай да туризмни оьсдюрювю къолайлаша.
Уьстде аты эсгерилген агьамиятлы милли проектни ичинде белгиленген жаваплы борчланы яшавгъа чыгъарыв ерли муниципал къурулувларыны ватандашларыны тавуш беривю булан оьтгерилегени гьакъда да айрыча эсгермеге тюше.
– Ерлерде яшайгъан ватандашланы ва гьакимликни арасындагъы байлавлукълар шолайлыкъда беклеше бара, – деди Дагъыстанны Халкъ Жыйыныны жамият, дин бирлешивлерини ва парламентара байлавлукъларыны комитетини председателини заместители Елена Ельникова. – Айтмагъа сюегеним, гележекде де биз ерлерден республикабызны яшавлукъ-экономика масъалаларын ёрукълашдырывгъа байлавлу болуп пайдалы таклифлени къаравуллайбыз.
Эсгерилген министерликни кюрчюсюнде къурулгъан жамият советини башчысы Ферезулла Къагьриманов да аянлашдыргъан кюйде, автомобиль ёлланы сан янын яхшылашдырывгъа байлавлу ишлер гележекде де давам этилежек. Милли проектни оьлчевюнде белгиленген борчлар тарыкълы ломай харж маялар булан да таъмин этилине. Дагъы да ачыкълашдырып айтсакъ, 2022-нчи йылгъа «Аманлыкъны асил ёллары» деген проектде белгиленген борчланы яшавгъа чыгъармакъ учун бу йылгъа 2 343, 1 миллион манат акъча маялар гёрсетилген. Шону бир миллиардгъа ювугъу федерал бюджетден берилегени гьакъда да айрыча эсгерме тюше.
Ломай харжланы асувлу кюйде пайдаландырмакъ учун иш юрютюв къурумлар булан 19 дыгъар байлангъан. Бу йыл тахшагьарыбызда Россияны Игитини Абдулгьаким Исмайыловну аты къоюлгъан орамында да ярашдырыв-янгыртыв ишлер оьтгерилежек.
Къ. КЪАРАЕВ.
