Йигирма сегизинчи октябрде Краснодарда болма тюшеген «Анжини» Россияны чемпионатыны он дёртюнчю турунда «Кубань» булангъы оюнуна, команданы бу йыл осал ойнайгъанына да къарамай, Дагъыстандан эки юзден де къолай адам баргъан эди. Олагъа ерли дагъыстанлылар да къошулуп, стадионда «Анжини» якълайгъан къаравчулар беш юзге ювукъ болду.

Биринчи таймда «Кубань», бизин Бенуа Ангбваны эки хатасындан пайдаланып, Кержаковну къапусуна эки топ гийирди. Эки де гезик Ангбваны янгылышы барны баш тренерибиз Гьажи Гьажиев де айтды. Биринчи таймда буса «Анжи» «Кубандан» хыйлы къолай ойнады, къоркъунчлу мюгьлетлени де бизинкилер кёп яратды.

Оюнну башында чы бизин чапгъынчы Соломатин «Кубанны» къапучусу Беленовну да алдатып, алдындагъы боп-бош къапулагъа топну гийирмей токътап къалды. Сонг о топну артдан етишген «Кубанны» якълавчулары, тебип, угловойгъа йиберди. Сонг билинген кюйде, «Кубанны» къаравчуларыны бириси оьзюню зыбызгъысы булан трибунада олтургъан еринден сызгъыргъан, Соломатин де, о судьяны сызгъырыву болгъан буса ярай, мен офсайддаман деген ой булан, токътап къалгъан. Озокъда, сынаву бар футболист-профессионал болгъан буса, бир сызгъырывгъа да къарамайлы, о топну къапулагъа гийирер эди... Соломатин жап-жагьил яш, ондан гечме ярай.

Бизге къаршы токътагъан команданы чапгъынчысы Букур, арт вакъти гючлю оюн гёрсете, бу оюнда да ол биринчи таймны он дёртюнчю ва къыркъ биринчи минутларында «Анжиге» эки топ гийирди.

Утдургъаныбыз аз йимик, оюнну ортасында краснодарлы миллетчилер стадионгъа жыйылгъан он уьч мингге ювукъ адам гёреген кюйде, Дагъыстан Республиканы байрагъын от салып яллатды. О гьакъда «Анжини» вакиллери шо ишни этгенлер такъсыргъа тартылсын деп Футбол советге кагъыз да язгъан.