Мен – Къарабудагъгентдеги китапханы къуллукъчусуман. Китапханачыны касбусун юрютегеним кёп йыллар бола. Оьзюмню касбу борчларымны кюте туруп, гьар гюн магъа уллулар булан да, яшлар булан да къатнамагъа тюше. Шо саялы да, савлай дюньягъа яйылып турагъан коронавирусгъа къаршы вакцина этдирмеге имканлыкъ тувулунгъандокъ, мен кёп ойлашып турмадым. Инг алда оьзюмню ва агьлюдеги мени ювукъ адамларымны, иш ёлдашларымны, олай да бизге китап алмагъа гелеген юртлуларымны савлугъун ойлашып, биринчилерден болуп, март айда коронавирусгъа къаршы вакцина этдирдим.
Яш йылларыбызны эсге алсакъ да, бизге гьар тюрлю югъагъан аврувлагъа къаршы уколлар да этилинген. Коронавирусгъа къаршы вакцина этдирме къоркъмагъыз.
Гелигиз, барыбыз да бир йимик бирлешип, шо дарманны этдирейиклер, шо­гъар сизин барыгъызны да ча­къыраман. Шолай этсек, шо къоркъунчлу аврувну яйылывуну алдын алывдан къайры да, бир де къопдурувсуз айтгъанда, шону ер юзюнден ёкъ этмек учун шартлар, имканлыкълар яратылажакъ.
Оьсюп гелеген яшларыбызны, авлетлерин де, олардан туважакъланы гьакъында да ойлашмагъа герекбиз.