Апрель айны биринден тутуп, июль айны 15-не ерли яшланы язбашгъы асгер къуллукъгъа чакъырыв узатыла. Артдагъы вакътилерде армияны сыдраларына чагъы етишген яшланы санаву арта демеге ярай.
ДР-ни Къызылюрт шагьаргъа, Къызылюрт ва Хумторкъали районлагъа къарайгъан комиссариатында асгерге чакъырыв ёрукълу юрюле деп ташдырып айтма болабыз. Муна, артдагъы гюнлерде Магьачкъалада ерлешген асгерге чакъырыв пунктуна жагьиллерден 24 адам бакъдырылды. Оланы да 8-вю − Хумторкъали районну Къоркъмаскъала юртундан.
Военный комиссар Шейхсайит Магьамматов, Къоркъмаскъала юртну башчысыны борчларын заманлыкъгъа кютеген Запир Амиров ва оьзгелер асгер къуллукъгъа чакъырылагъанланы узатма гелген.
Насигьатлы сёзлени айта туруп, оьзюню сёйлевюнде Запир Амиров жагьиллени асгер борчларына намуслу кюйде янашгъандан къайры да, тувгъан-оьсген элин, оьзлени тарбиялагъан ата-ананы унутмайлы, эсин жыйып турмакъны ёрады.
Ери гелгенде айтып къояйым, шо гюн армиягъа чакъырылагъанланы арасында Запирни уланы да бар эди. Микайыл бу йыл Магьачкъала шагьарда ерлешген автодорожный коллежни уьстюнлю кюйде тамамлагъан ва асгер борчун кютме гёнгю барны айтды.
