Пермь шагьарны «Амкар» командасы Россияны футбол оюнуну чемпионатыны он биринчи турунда Ростовну 2:1 санав, краснодарлы Кубанны чы ят майданда 3-0 санав булан утуп, Магьачкъалада да уьч очко алмакъ деген мурат булан гелген эди. «Амкарны» баш тренери осетинли Станислав Саламович Черкесов команданы бу сезонгъа яхшы гьазир этген. Он турдан сонг «Амкар» – турнир таблицада алтынчы ерде. Оланы гьаракатына къарагъанда, дагъы да оьрленмеге талпынса тюгюл, алтынчы ерден тёбен тюшме хыялы да ёкъ. Шону «Анжи» булангъы оюн кёп арив исбатлады.
Биринчи минутдан тутуп, эки де команда футбол майданны ортасын елеме сююп кёп гьаракат этдилер. Къаравчулар да шо чалышывну ушатды. Биринчи топну Алан Гатагов «Амкарны» къапусуна башлапгъы таймны ахырынчы къыркъ бешинчи минутунда он бир метрлик штрафнойдан уруп гийирди. Командалар танапусгъа 1-0 санав булан гетди.
Экинчи таймда да командалар биринчи бёлюгюнде тутгъан ёлундан тайышмай оюнун давам этди. Футбол майданда оюнну бир-бир гесеклеринде «Амкар», бир-бир мюгьлетлеринде буса «Анжи» къолай гёрюне эди. Алтмыш бешинчи минутда, бизин якълавчу Бенуа Ангвбаны хатасындан пайдаланып, пермлилени чапгъынчысы Максим Канунников оюнну тенглешдирип, 1-1 санав этди. Бары да къаравчулар, минглер булангъы адамлар, оюн шо санав булан битме де битер деп турагъанда, «Амкарны» чапгъынчысы Игорь Пикущак, бек гьаракат этип, «Анжини» къапусуна экинчи топну гийирди… О заман оюн битме эки минут къалгъан эди. «Анжи» бу оюнун да утдурагъангъа шекленегенлер де ёкъ эди.
Тек, арадан бир минут гетип, «Анжини» чапгъынларыны натижасында, Павел Соломатин оюнну 2:2 санав этди. Ондан сонг да, Исламнур Абдулавов Амкаргъа топ гийирме болагъан имканлыгъын къолундан чыгъармагъан буса, «Анжи» шу оюнну утуп да болажакъ эди.
Шолайлыкъ булан, «Анжи» турнир таблицаны мекенли кюйде ахырынчы ерин тутуп токътагъан. Тренер составны ва футболистлени баянлыкъларына гёре, тренировкалардагъы ва оюнлардагъы къастын гьисапгъа алгъанда, бизин команданы гележеги болажакъ. Гьалиги къыйынлыкълар заманлыкъгъа деп ойлашма сюемен.
Гелеген оюнну «Анжи» Европаны лигасында Англияны « Тоттенхем Хотспур» (Лондон) командасы булан Раменскийде ойнай. Россияны чемпионаты буса алтынчы октябрде давам этилежек. О гюн бизин «Анжи» Къазанда ерли «Рубин» булан ойнажакъ.
